Dy ish-drejtues të Policisë së Shtetit janë shpallur të pafajshëm nga Gjykata e Tiranës. Nevila Mamo, ish-shefe dhe specialiste në logjistikë në FNSH dhe Genci Reçi, shefi i shtabit, u denoncuan nga ministria e Brendshme për abuzime me dietat dhe karburantet.
Ata u prangosën në muajin maj të vitit të kaluar nga SHÇBA, por më pas gjykata i ka lënë të lirë. Çështja u hetua dhe shkoi në gjykatë. kjo e fundit, sipas vendimit që disponon gazeta “Shqip”, i shpalli të pafajshëm, me arsyetimin se “fakti nuk qëndron”. Mamo dhe Reçi u akuzuan për shpërdorim detyre, korrupsioni pasiv dhe falsifikimit të dokumenteve.
Ministria e Brendshme pretendonte se këta persona, nëpërmjet mekanizimit të falsifikimit të dokumenteve kanë abuzuar me detyrën, duke shpërdoruar fondet publike për një periudhë 2-vjeçare. Dëmi ekonomik i shkaktuar buxhetit ishte llogaritur në qindra miliona lekë. Ministria pretendonte se bëhet fjalë kryesisht për dietat e punonjësve të FNSH-së, të cilat kishin të bënin me aksionet apo shërbimet e specialëve.
“Duke u bazuar në prova, gjykata arrin në përfundimin se akuza e ngritur kundër të pandehurve Genci Reçi dhe Nevila Mamo, nuk qëndron, gjatë gjykimit nuk u provua plotësisht tej çdo dyshimi që i pandehuri Genci Reçi, në cilësinë e Shefit të Planifikimit Koordinimit të Operacioneve në Komisariatin e NSH Tiranë, si dhe e pandehura Nevila Mamo, në cilësinë e Specialistes së shërbimeve në Seksionin e Administratës, të kenë falsifikuar me dashje dokumentet të cilat ata kanë pasur për detyrë të lëshojnë” thuhet në vendimin e gjykatës.
Dyshimet e prokurorisë lidheshim për periudhën buxhetore janar – gusht 2013, ku rezultojnë 6261 racione ushqimi të paguara më tepër se numri i personave prezent.
