Kreu i SPAK, Altin Dumani, prokurori Përgjithshëm Olsian Çela dhe kreu i KQZ, Ilirjan Celibashi, të ftuar nga ambasadori gjerman, kanë treguar gjetjet e deritanishme në terren.
Mësohet se të pranishëm gjatë raportimit të Dumanit, Celibashit dhe Çelës kanë qenë edhe përfaqësues nga Ambasada e SHBA, ambasadori i Britanisë së Madhe dhe ai i Francës, të cilët i kanë drejtuar pyetje tre të ftuarve.
Disa javë më parë krerët e institucioneve treguan detaje lidhur me rastet e krimeve zgjedhore para Ambasadës britanike në Tiranë.
Kjo ka sjellë reagimin e ashpër të Ylli Manjanit.
Ai ka kërkuar shkarkimin e tyre.
“Po te Ambasada Ruse kur e kanë radhën të raportojnë Çela, Dumani dhe Celibashi?!
Tani janë bërë dhe bashkë me Amerikën ata…!
***
Nuk e di d.m.th, po turp është shumë pak kjo që 3 drejtues institucionesh lenë zyrat e tyre dhe shkojnë nëpër ambasada për të raportuar për detyrat publike që ua ka dhënë shteti shqiptar!
Nuk jam sovranist, aq më pak patriot, por kjo që na shohin sytë ka të bëjë me dinjitetin.
Nuk e pranoj këtë sjellje vulgare anti-shtet e anti-dinjitet të institucioneve publike për të cilat paguajmë ne të gjithë.
As shtetet e fiseve afrikane nuk e bëjnë këtë gjë!
Shteti normal do duhej ti kishte shkarkuar menjëherë të tre drejtuesit që raportojnë zyrtarisht dhe me media për punën e tyre tek një ambasadë e huaj, cilado qoftë ajo”, shkruan Manjani.
