Prezenca e OSBE-së në Shqipëri, Autoriteti Kombëtar italian i Antikorrupsionit dhe Koordinatori Kombëtar kundër Korrupsionit organizojnë në Tiranë tryezën teknike për parandalimin e korrupsionit. Një tryezë teknike mbi mjetet e parandalimit të korrupsionit dhe planifikimin e integritetit për zyrtarë publikë të institucioneve të nivelit qendror u mbajt më 28 dhe 29 mars 2019 në Tiranë.
Veprimtaria u organizua nga Prezenca e OSBE-së në Shqipëri dhe Autoriteti Kombëtar italian i Antikorrupsionit (ANAC), në bashkëpunim me Koordinatorin Kombëtar kundër Korrupsionit. Përmbajtja e tryezës teknike, e cila iu përshtat nevojave të pikave fokale të antikorrupsionit në ministritë e linjës dhe institucione të tjera qendrore, u hartua nga ANAC-u dhe Koordinatori Kombëtar kundër Korrupsionit.
Tryeza u përqendruar në ofrimin e mjeteve dhe udhëzimeve për promovimin e integritetit në institucionet publike; në përdorimin e të dhënave dhe të transparencës për të luftuar korrupsionin në prokurimet publike; në rritjen e aftësive për zhvillimin dhe zbatimin e planeve parandaluese; si edhe në menaxhimin e riskut në hartimin e politikave të integritetit dhe antikorrupsionit. Gjithashtu, pjesëmarrësit shkëmbyen praktikat më të mira dhe përvojën e tyre në fusha specifike.
Kjo tryezë teknike ishte veprimtaria e fundit e projektit të zbatuar nga Prezenca “Mbështetja për masat antikorrupsion në Shqipëri (2014-2019)”, i cili u mbështet nga Agjencia Italiane e Bashkëpunimit për Zhvillim dhe Banka Evropiane për Rindërtim dhe Zhvillim, në bashkëpunim me Shkollën Italiane të Administratës Publike. Puna e Prezencës së OSBE-së për të rritur më tej kapacitetet dhe ndërgjegjësimin e punonjësve publikë do të vijojë. /a.meta
