Donald Trump të mërkurën la të hapur mundësinë e zhvillimeve pas vizitës së papritur të drejtorit të CIA-s, John Ratcliffe, në Moskë, duke konfirmuar se çështja e luftës në Ukrainë u ngrit në kontaktet e tij.
Duke folur në emisionin “The Glenn Beck Program” në YouTube , Trump e përshkroi vizitën e shefit të CIA-s si “pothuajse rutinë”, duke u përpjekur të minimizonte spekulimet se ajo lidhej me një përshkallëzim të ri të mundshëm në marrëdhëniet midis Uashingtonit dhe Moskës.
“Ai nuk është aty për asnjë nga gjërat që përmendët ”, iu përgjigj ai Glenn Beck, i cili iu referua skenarëve të një përpjekjeje të mundshme nga Vladimir Putin për të testuar forcën e NATO-s.
“Tani, diçka mund të dalë nga kjo. Po punojmë shumë për t’i dhënë fund kësaj lufte “, shtoi Trump.
Presidenti amerikan pohoi gjithashtu se si Rusia ashtu edhe Ukraina duan t’i japin fund armiqësive, ndërsa përsëriti pretendimin e tij se lufta nuk do të kishte shpërthyer nëse ai do të kishte qenë në Shtëpinë e Bardhë kur filloi pushtimi rus.
Vizita e Ratcliffe në kryeqytetin rus ishte vizita e parë e njohur e një shefi të CIA-s në Moskë që nga viti 2021. Kremlini konfirmoi se zyrtari amerikan kishte zhvilluar bisedime me përfaqësues të agjencive të inteligjencës ruse, megjithatë, pa zbuluar përmbajtjen e tyre.
Zëdhënësi i Kremlinit, Dmitry Peskov, sqaroi se Ratcliffe nuk u takua me Presidentin rus Vladimir Putin. Megjithatë, ky i fundit u informua menjëherë për rezultatet e kontakteve.
Peskov e përshkroi si pozitiv faktin që kanalet e komunikimit midis agjencive të inteligjencës së dy vendeve ruhen, duke vënë në dukje se kontakte të tilla shpesh vazhdojnë edhe në periudhat më të vështira të marrëdhënieve dypalëshe. Ai paralajmëroi, megjithatë, se është ende shumë herët për të vlerësuar nëse kjo vizitë specifike mund të kontribuojë në daljen e marrëdhënieve SHBA-Rusi nga “kriza e thellë” në të cilën ndodhen.
