Presidenti i SHBA-së, Donald Trump, ka reaguar ashpër ndaj afrimit të Bashkimit Evropian me Kanadanë, duke kërcënuar me vendosjen e tarifave të larta doganore dhe madje me ndërprerjen e marrëdhënieve tregtare me BE-në.
Gjatë një tubimi në SHBA, Trump e cilësoi si “qesharake” idenë e një partneriteti më të ngushtë mes BE-së dhe Kanadasë. Ai paralajmëroi se, nëse një marrëveshje e tillë do të konsiderohej si një akt armiqësor ndaj SHBA-së, do të merrte masa ekonomike.
“Do të vendosja tarifa shumë të rënda ndaj produkteve që vijnë nga Evropa. Nëse do ta bënin këtë, nuk do të bënin gjë tjetër veçse do ta përkeqësonin situatën”, deklaroi Trump.
Presidenti amerikan i bëri komentet pasi BE-ja dhe Kanadaja avancuan diskutimet për një partneritet më të ngushtë, që synon forcimin e bashkëpunimit ekonomik dhe strategjik mes dy palëve.
Kryeministri kanadez Mark Carney mbajti një qëndrim krejtësisht të kundërt me Trump. Ai tha se forcimi i marrëdhënieve mes Kanadasë dhe BE-së do të ishte pozitiv dhe se një Kanada më e fortë do të ishte një partner më i mirë edhe për Shtetet e Bashkuara.
“Një aleancë është një proces pozitiv. Një Kanada më e fortë dhe më rezistente është një partnere më efektive edhe për SHBA-në, dhe e njëjta gjë vlen për BE-në”, tha Carney gjatë një konference për shtyp me presidenten e Parlamentit Evropian, Roberta Metsola.
Sipas tij, partneriteti me Evropën do të ndihmonte në forcimin e sovranitetit të Kanadasë dhe në rritjen e qëndrueshmërisë së saj përballë krizave dhe goditjeve të jashtme.
Carney sqaroi gjithashtu se termi “anëtar i asociuar” nuk nënkupton që Kanadaja synon të bëhet anëtare me të drejta të plota e Bashkimit Evropian.
“Kanadaja nuk është në pozicion dhe nuk ka synim të bëhet anëtare me të drejta të plota e Bashkimit Evropian. Ajo që ka rëndësi është përmbajtja”, u shpreh kryeministri kanadez.
Carney dhe Metsola kanë argumentuar se bashkëpunimi më i ngushtë mes Evropës dhe Kanadasë mund të ndihmojë të dyja palët të rrisin sigurinë, prosperitetin dhe autonominë strategjike.
“E ardhmja është e jona”, tha Carney, duke mbështetur mesazhin e Metsolës se Evropa dhe partnerët e saj duhet të marrin më shumë përgjegjësi për të ardhmen e tyre.
Marrëveshja përfundimtare për një aleancë të tillë ende duhet të marrë miratimin e institucioneve përkatëse në Kanada. Ndërkohë, deklaratat e Trump tregojnë se afrimi BE-Kanada mund të hapë një tjetër front në marrëdhëniet tregtare mes Uashingtonit dhe Brukselit.
