Donald Trump është më pak se dy javë larg betimit të tij si President i Shteteve të Bashkuara të Amerikës. Krahu i tij i djathtë dhe personi që shpenzoi qindra miliona dollarë për ta ndihmuar atë të kthehej në Shtëpinë e Bardhë, Elon Musk po fokusohet gjithnjë e më shumë në politikën evropiane.
Që nga zgjedhja e Trump, Musk e ka kthyer fokusin e tij të guximshëm drejt Evropës në postimet e tij të shpeshta në X. Ai ka bërë thirrje për lirimin e një agjitatori të së djathtës ekstreme nga burgu në Mbretërinë e Bashkuar. Ai e quajti Kryeministrin Kier Starmer “tërësisht të neveritshëm” dhe pyeti veten nëse Amerika duhet ta “çlirojë” Britaninë.
Musk ka futur veten dhe ka nxitur një grindje politike mbi trajtimin e qeverisë së Mbretërisë së Bashkuar të një hetimi ndaj bandave që shfrytëzonin seksualisht fëmijët. Kur bleu Twitter-in, tani i quajtur X, në vitin 2022, ai tha se luftimi i imazheve të abuzimit seksual të fëmijëve në platformë ishte “Prioriteti numër 1”.
Musk postoi javën e kaluar në lidhje me skandalin e kujdesit në Mbretërinë e Bashkuar, duke bërë thirrje që Starmer të jepte dorëheqjen dhe të burgosej për “bashkëfajësi të tij në krimin më të keq masiv në historinë e Britanisë”.
Gazeta të tjera britanike, të tilla si “Daily Telegraph”, kanë pasur gjithashtu një mbulim të konsiderueshëm të komenteve të Musk dhe raportuan se Musk po mendonte për një donacion të madh për partinë Reformë në Mbretërinë e Bashkuar të Nigel Farage. Musk gjithashtu ka mbështetur partinë e ekstremit të djathtë AfD të Gjermanisë përpara zgjedhjeve në fund të shkurtit. Komentet e tij kanë sjellë qortime nga liderët në mbarë kontinentin.
“Vetëm AfD mund ta shpëtojë Gjermaninë,” shkroi Elon Musk në një postim në platformën e tij të mediave sociale X pak para Krishtlindjeve. Një javë më vonë, gazeta gjermane DIE WELT botoi një shkrim nga miliarderi duke shpjeguar mbështetjen e tij për Alternativën e ekstremit të djathtë për Gjermaninë. Ai e ka quajtur Scholz një “budalla” dhe presidentin Frank-Walter Steinmeier një “tiran jodemokratik”.
Mbështetja e Musk për Alternativën e Djathtë gjermane i ka kushtuar shumë njeriut më të pasur të botës. Presidenti francez Emmanuel Macron akuzoi Elon Musk se kishte shkuar shumë larg në mbështetjen e tij për AfD. “Dhjetë vjet më parë, kush mund ta imagjinonte nëse do të na kishin thënë se pronari i një prej rrjeteve sociale më të mëdha në botë do të mbështeste një lëvizje të re reaksionare ndërkombëtare dhe do të ndërhynte drejtpërdrejt në zgjedhje, përfshirë Gjermaninë,” tha ai në një fjalim në Pallatin Elysee.
Presioni është tani mbi Komisionin Evropian për t’u përgjigjur, duke pasur parasysh se ai është përgjegjës për zbatimin e Aktit të Shërbimeve Dixhitale të Evropës, i cili kontrollon platformat e mediave sociale duke përfshirë X dhe kërcënon me gjoba mbresëlënëse deri në 6% të qarkullimit global, ose edhe me bllokime të përkohshme në rast të një shkeljeje.
Udhëheqësit në katër vende evropiane – Francë, Gjermani, Norvegji dhe Mbretërinë e Bashkuar – denoncuan ndikimin e tij në deklarata të veçanta, duke paralajmëruar se Musk, CEO i Tesla dhe SpaceX, nuk duhet të përfshihet në politikën e vendeve të tyre. Për të huajt, sulmet e tij ndaj zyrtarëve të zgjedhur me të cilët ai nuk pajtohet, rrezikojnë të shfaqen si një përpjekje e një qeverie të ardhshme të SHBA-së për të ndërhyrë në politikat e demokracive dhe kombeve sovrane për të destabilizuar qeveritë e tyre.
Megjithatë, Musk e ka një mbështetës që i qëndron përkrah, ai është Donald Trump. Ky i fundit ka kërcënuar Kanadanë se do ta bëjë shtetin e 51 të Amerikës. Vendi me 40 milion banorë ndjhen për herë të parë rrezikun që i kanoset nga jugu. Po ashtu kërkon të marrë Kanalin e Panamsë si rrjedhojë e rritjes së influencës kineze atje dhe ndëkohë ka dërguar djalin e tij të madh, Donald Trump Junior për një vizitë në Groenland, e cila është vënë nën syrin e Trump për aneksim të butë.
Sakaq, analistët besojnë se në mandatin e parë të Trump, kur ai bëri politikën e jashtme me një postim në Twitter, Amerika u bë një forcë në përçarjen globale. Roli i spikatur i Musk në administratën e tij të dytë mund t’i bëjë ato katër vite të duken të qëndrueshme në krahasim me të kaluarën.
