Shqipëria do të shkojë me moralin lartë në sfidën e parë të Kampionatit Europian, atë ndaj Italisë më 15 qershor.
Kuqezinjtë mposhtën modestët e Lihtenshtejnit më 3 qershor, ndërsa mbrëmjen e së premtes fituan 3-1 ndaj Azerbajxhanit, një kundërshtar me një nivel jo për t’u nënvlerësuar dhe këtë e bënë edhe duke i lëshuar territor, si përgatitje për sfidat në grup.
Këto paraqitje janë pasqyruar gjerësisht edhe në mediat italiane. Sportmediaset shkruan se Shqipëria e Sylvinhos ka fituar me lehtësi 3-1 edhe ndaj Azerbajxhanit dhe këtë, sipas tyre, e ka bërë me 5 “italianë” në fushën e lojës, duke iu referuar Hysajt, Gjimshitit, Asllanit, Ramadanit e Bajramit, për të cilin shkruajnë se ka bërë një paraqitje të shkëlqyer.
Ndërkohë, në kampin italian, kundërshtari i parë i Shqipërisë në Europian, vijon të shqetësojë Barrella, i cili ka pësuar një dëmtim dhe me shumë mundësi mund të mungojë në ndeshjen e parë të Europianit. Megjithatë, ai do të kryejë një kontroll të ri gjatë së shtunës për të parë më qartë shkallën e dëmtimit dhe kohën e rikuperimit.
/a.r
