Shpërthimi i tritolit në makinën e Naim Qarri duket se ka lidhje me konflikte që Presidenti i Kamzës ka me persona të tjerë.
Burime nga Policia e Tiranës thanë për Report TV se po hetohet për konfliktet që Naim Qarri ka patur në fushën e biznesit.
Për këtë arsye do kërkohen të gjitha tabulatet telefonike të celularëve të Naim Qarrit, për të parë nëse ai është kërcënuar kohët e fundit.
Gjithashtu po hetohet edhe pista e konfliktit për shkak të rolit që ai ka si President i Kamzës. Vendosja e tritolit në pjesën e poshtme të makinës tip Hammer dhe shpërthimi në një moment që aty nuk ka patur njeri, tregon sipas hetuesve se kemi të bëjmë me një paralajmërim që I është bërë Naim Qarrit.
Naim Qarri: Nuk kam konflikte
Presidenti I Kamzës në dëshminë që ka dhënë në Polici është shprehur se nuk ka konflikt me njeri. “Nuk e di se kush e ka vendosur lëndën shpërthyese. Nuk kam konflikt me njeri”, – është shprehur Presidenti I Kamzës.
Por sipas hetuesve Naim Qarri ka fshehur disa konflikte që ka patur në muajt e fundit, për të cilët Policia thotë se po verifikon ccdo rast. Dyshohet se edhe disa borxhe të vjetra mund të jenë shkak i paralajmërimit që i është bërë Qarrit, duku i vendosur lëndë shpërthyese.
150 gr tritol iu vendos Presidentit të Kamzës në pjesën e poshtme të makinës në Bathore. Ngjarja ndodhi mbrëmjen e djeshme dhe hetuesit thonë se kemi të bëjmë me një shpërthim me telekomandë, për këtë arsye janë sekuestruar kamerat e disa bizneseve në zonë, për të zbuluar personat që e kanë vendosur tritolin poshtë makinës.
Naim Qarri kishte parkuar makinën dhe ishte në një lokal aty pranë, kur ka ndodhur shpërthimi i fuqishëm. Policia ka shoqëruar 6 persona të cilët janë marrë në pyetje, nëse kanë pare apo jo personin që ka vendosur tritolin poshtë makinës.
