Ngjarja e rëndë që ndodhi mbrëmjen e djeshme në Burrel, la të traumatizuar banorët përreth. Sasia e tritolit që u vendos pranë banesës së Alfred Krajës, punonjësit të SHIK dëmtoi katin e parë të pallatit dhe banesat pranë, duke thyer dyer dhe dritare.
Ngjarja ka ndodhur rreth orës 23:00 të mbrëmjes së djeshme, ndërkohë që Karaj së bashku me familjen e tij nuk ishin në shtëpi, pasi ishin në kryeqytet, te disa të afërm të tyre. Ngjarja ka shkaktuar panik te të gjithë komshinjtë dhe banorët e pallatit disa katësh.
Fatmirësisht nga shpërthimi nuk ka të lënduar, por vetëm dëme materiale të konsiderueshme, ndërkohë që sasia e tritolit dyshohet se ka qenë mjaft e madhe, dhe është vendosur në pragun e shtëpisë.
Nga ana tjetër vetë punonjësi i SHISH, Alfred Karaj, e lidh ngjarjen me detyrën, pasi shprehet se nuk ka pasur konflikte të tjera. Së bashku me policinë, në vendngjarje ka shkuar edhe prokurori i Matit, Abaz Muça, për të ndjekur nga afër hetimet.
Gjithashtu, nga Tirana kanë mbërritur edhe forcat anti-eksploziv për të asistuar në zbardhjen e ngjarjes dhe zbulimin e lëndës plasëse apo sasinë që ishte vendosur.
g.kosovari
