Tirana ka mposhtur 2-1 Kukësin në takimin e zhvilluar sot në Tiranë. Kjo ishte një fitore që injekton moral për Tiranën e Ilir Dajës që debuton me fitore në ndeshjen e tij të parë me skuadrën bardheblu.
Ekipi kryeqytetas regjistroi suksesin e tretë sezonal në sfidën kundër Kukësit të zhvilluar në “Qemal Stafa”. Me dy gola të shënuar në pjesën e parë Tirana mbylli llogaritë ndaj nënkampionëve që konfirmojnë formën e dobët në transfertë edhe pse arritën të ngushtojnë rezultatin vetëm në fundin e takimit.
Tirana e nisi ndeshjen me topin në këmbë për të imponuar ritmin dhe ia doli të merrte kontrollin e sfidës që në sekondat e para. Skuadra e Ilir Dajës u shfaq agresive në gjysmëfushën e miqve. Elis Bakaj dha sinjalin e parë në minutën e 6 me një goditje nga jashtë zonës që u devijua nga Koçi dhe pak sekonda më pas, kapiteni Gentian Muça devijoi saktësisht me kokë krosimin e ardhur nga Gilman Lika.
Bardheblutë nuk u ndalën këtu pasi ishte japonezi Fukui në krahun e majtë të sulmit bëri gjithçka mirë në minutën e 16 duke dhuruar një top në ajër për Bakajn që nuk arriti të shtangte Koçin. Kukësi u zgjua 6 minuta më pas por goditja e Leomir Cruz nuk e kapi në befasi portierin Bakaj që e devijoi topin në goditje nga këndi. Ishte sërish Fukui në 7 minuta nga fundi i pjesës së parë që harkoi topin që përfundoi në këmbët e Franc Veliut i cili e devijoi në portën e tij.
Në minutën e 55 Kukësi i udhëhequr nga Flores në sulm tentoi të ngushtonte diferencën, por goditja e brazilianit nuk u finalizua me sukse. Në krahun tjetër, Bakaj tentoi eurogolin 4 minuta më pas por goditja e tij përfundoi mbi tranversën e Koçit. Në të 61-ën Gilman Lika shënjestroi portën e miqve por ishte sërish Koçi ai që i mohoi Tiranës festën e golit të tretë.
Kukësi i ngushtoi diferencat në minutën e parë të kohës shtesë me një gol të Micit që vlen thjesht sa për statistika. Skuadra e Dajës e menaxhoi rezultatin duke mos e vënë asnjëherë në dyshim fitoren që e ngjit në kuotën e 13 pikëve, ndërsa Kukësi mbetet në vendin e 3 me 16 pikë.
