Pas një debati që Edi Rama dhe Mimoza Hafizi patën të enjten e kaluar në aulën e parlamentit, në lidhje me ligjin e plehrave, ka reaguar vetëm këtë të dielë deputetja socialiste, duke e cilësuar Kryeministrin si një person krejt të çekuilibruar emocionalisht.
STATUSI I HAFIZIT:
Miq, Ķëto ditë kam pasë shume komunikime nga të njohur e të panjohur, të cilët kanë ndjekur në media reagimin harbut të kryeministrit ndaj meje, në sallën e parlamentit, të enjten e kaluar.
Reagim për një debat shumë qytetar dhe profesional që unë hapa në lidhje me importin e mbetjeve.
Nje student ekselence më shkruan: “Lëre mediokritetin të ngazëllehet në injorancën e vet! “
Une pikërisht këtë bëra, e lashë të japë i vetmuar atë ditë, atë shfaqje të trishtë për çdo shqiptar, teksa sheh kryeministrin e vet krejt të çekuilibruar emocionalisht e të çakorduar në shifra e argumente.
Reagimi vjen pas një debati të nisur nga vetë Hafizi, e cila e pyeti në parlament Ramën në lidhje me importin e plehrave
“Në 2013 janë ricikluar 10%, ndërsa vitin e shkuar 17% domethënë riciklimi është rritur me dyfishin. Pra në 2013, kur ky biznes punonte me 10% kapacitet, ne e hoqëm ligjin dhe mirë bëmë, ndërsa tani që e kemi dyfishuar punën e këtyre bizneseve, e risjellim ligjin. A ka njeri që e kupton këtë?!”- pyeti Hafizi.
Por përgjigja e Ramës ishte e ashpër:
“Një deputete bëri pyetje a ka njeri që e kupton këtë… dhe unë duke qenë i bindur që të gjithë njerëzit këtu që duan të kuptojmë e kanë kuptuar, po ja shpjegoj deputetes që të ndjehet njeri.. që të mos i duket ngaqë nuk kupton se nuk është njeri”
Që të ndjehesh si gjithë njerëzit më dëgjo… Së pari unë thashë që në 2013 ishte ca më shumë se 10%, pasi nuk ka pasur asnjëherë matje statistikore si e kemi pasur ne dhe tani është 17%, do të thotë se këto biznese janë stërmunduar, por tani janë duke falimentuar”- do të përgjigjej Rama./java/a.k
