Udhëheqësit demokratë të Dhomës së Përfaqësuesve në Shtetet e Bashkuara kanë lëshuar një deklaratë të përbashkët me tone të ashpra, duke kërkuar rikthimin e menjëhershëm të Kongresit në seancë legjislative për t’i dhënë fund konfliktit në Lindjen e Mesme.
Në deklaratën e tyre, ligjvënësit e cilësuan Presidentin Donald Trump si “plotësisht të çekuilibruar”, pas retorikës së tij të fundit kërcënuese.
“Deklarata e tij që kërcënon të zhdukë një qytetërim të tërë trondit ndërgjegjen dhe kërkon një përgjigje vendimtare të Kongresit,” thuhet në deklaratën e nënshkruar nga udhëheqësi i pakicës demokrate, Hakeem Jeffries, anëtarja e lartë e grupit parlamentar Katherine Clark, si dhe katër ligjvënës të tjerë të lartë demokratë.
Demokratët paralajmëruan se vendimi për përfshirjen në konflikt mund të ketë pasoja katastrofike globale, nëse dega legjislative nuk ndërhyn urgjentisht për të frenuar veprimet e Shtëpisë së Bardhë.
“Dhoma e Përfaqësuesve duhet të kthehet në seancë menjëherë dhe të votojë për t’i dhënë fund kësaj lufte të pamatur të zgjedhur në Lindjen e Mesme, përpara se Donald Trump ta zhytë vendin tonë në Luftën e Tretë Botërore,” theksohet në apelin e tyre.
Në mbyllje, udhëheqësit demokratë i bënë një thirrje të drejtpërdrejtë kolegëve të tyre republikanë në Dhomën e Përfaqësuesve, duke u kërkuar atyre që të kapërcejnë ndasitë politike. Ata apeluan që republikanët të vendosin “detyrën patriotike mbi besnikërinë ndaj partisë” dhe t’u bashkohen për të “ndalur këtë çmenduri”.
