Zëvendësimi i një portieri si Federico Marchetti nuk është aspak i lehtë, por Thomas Strakosha po e bën më së miri detyrën e vet në katërkëndorin e Lazios, ndonëse debutues në Serinë A. Portieri shqiptar i ka bindur të gjithë skeptikët të cilën nuk e shihnin atë të gatshëm për futbollin italian, pas një gjysëm sezoni aspak bindës në radhët e Salernitanës. Paraqitjet e tij në dy ndeshjet kundër Milanit dhe Empolit kanë mjaftuar për t’i siguruar portierit shqiptar vlerësime jo vetëm nga media sportive, por edhe nga ekspertë të ndryshëm.
Ndoshta nuk ka autoritet më të madh për të folur rreth paraqitjes së një portieri sesa legjenda italiane e portës, Dino Zoff, një nga më të mëdhenjtë në historinë e futbollit botëror. Ish-kampioni i botës me Italinë, ashtu si shumë të tjerë, ka vlerësuar paraqitjet e Strakoshës, ndonëse ka theksuar se ishte ende herët që të jepej një mendim përfundimtar rreth këtij talenti të ri, duke lënë të kuptohet se i duhet dhënë më tepër kohë.
“Unë nuk mund të gjykoj menjëherë Strakoshën me vetëm dy ndeshje të luajtura. Por sipas meje, ai u tregua i aftë në të dy ndeshjet e luajtura, si ndaj Milanit, ashtu edhe ndaj Empolit”, tha 74-vjeçari Zoff në një intervistë të dhënë për “Cittacelestetv”.
Pas fitores me Empolin, mediat sportive italiane i vunë notën 7 Strakoshës, duke konfirmuar se paraqitje të tilla mund t’i siguronin shumë shpejt atij një vend në futbollin e rëndësishëm dhe jo domosdoshmërisht vetëm sa herë që dëmtohej Marchetti.
