Kryeministri britanik Keir Starmer po përballet me pakënaqësi në rritje brenda qeverisë së tij, për shkak të mënyrës se si ka trajtuar çështjen që lidhet me ish-ambasadorin në SHBA, Peter Mandelson.
Sipas raportimeve të “The Telegraph”, tensionet brenda kabinetit janë rritur ndjeshëm, duke ngritur pikëpyetje mbi qëndrueshmërinë e tij politike.
Media britanike raporton se disa anëtarë të kabinetit dhe aleatë të Starmer kanë shprehur pakënaqësi për shkarkimin e nëpunësit të lartë civil Ollie Robbins, një vendim që lidhet me çështjen e lejes së sigurisë së Mandelsonit.
Burime nga qeveria kanë bërë të ditur se marrëdhëniet brenda administratës janë dëmtuar dhe se funksionimi i përditshëm i qeverisë është bërë më i vështirë.
Ndërkohë, disa ministra e akuzojnë Starmer për thellimin e përçarjeve, ndërsa një pjesë e deputetëve laburistë kanë filluar të vënë në pikëpyetje hapur mbijetesën e tij në krye të partisë, sidomos përpara zgjedhjeve lokale.
Nga ana e tij, Starmer ka hedhur poshtë akuzat dhe ka mbrojtur qëndrimin e tij. Ai deklaroi se kundërshtarët politikë po bëjnë “çdo akuzë të mundshme” në lidhje me këtë çështje, duke theksuar se pretendimet ndaj tij kanë rezultuar të pasakta.
“Javën e kaluar thanë se ishte e pamundur që të mos isha informuar për kontrollin e sigurisë. Doli se e kishin gabim. Pastaj më akuzuan për pandershmëri edhe kjo rezultoi e pavërtetë. Tani po bëjnë çdo akuzë të mundshme sepse janë kundër asaj që kjo qeveri po përpiqet të arrijë”, është shprehur kryeministri britanik.
