Presidenti i Kosovës, Hashim Thaçi ka komentuar takimin që javën e kaluar kishte bashkë me liderët e shteteve të Ballkanit Perëndimor me përfaqësuesen e Lartë të BE-së, Frederica Moghernini.
“Të gjithë liderët e Ballkanit Perëndimor treguan përvojat e punës, sfidat dhe ballafaqimet për të ardhmen europiane të vendeve tona. Ishte konkludim i përbashkët i liderëve të Ballkanit Perëndimor dhe një zhgënjim masiv i shprehur për mosangazhimin konkret të Bashkimit Europian për shtetet e rajonit tonë”, thekson Thaçi.
Presidenti ka theksuar se ky zhgënjim përcillet edhe në Kosovë, në veçanti me mos liberalizimin e vizave, kur ne i kemi plotësuar të gjitha kriteret.
Kjo sipas tij po ndodh për shkak të mungesës së unitetit europian. Por, ne e kemi vetëm një të ardhme, atë europiane.“Prandaj, BE-ja dhe liderët e saj, në këtë kohë të mungesës së vizionit të tyre duhet të dëshmojnë se nuk do t’i bëjnë gabimet e liderëve të fillimviteve të 90-ta të BE-së, në kohën e fillimit të krizës jugosllave. Sepse, gjithmonë në Ballkanin Perëndimor ka potenciale të rrezikshme për paqen, sigurinë dhe stabilitetin”, ka shtuar ai.
Thaçi tha se Kosova dëshiron të besojë se BE-ja do të fillojë të ndryshojë pozitivisht për Kosovën dhe Ballkanin Perëndimor.
/a.r
