Presidenti Hashim Thaçi ka dhënë detaje për mediat pas takimit me kryeministrin e Kosovës, Avdullah Hotin me të cilin zhvilloi një takim paraditen e sotme.
Në fjalën e tij, kreu i shtetit Thaçi u shpreh se dialogu mes Kosovës dhe Serbisë duhet të përfundojë vetëm me njohje reciproke.
“Të ndodhë njohja reciproke dhe të mos lejojmë që ky dialog të zbresë në nivel teknik sepse dialogu është komplet politik. Niveli teknik do të thotë status quo,”-u shpreh Thaçi.
Ndërsa kreu i qeverisë Hoti, e siguroi presidentin se dialogu do të fokusohet vetëm tek njohja e Kosovës nga Serbia.
“Ne do të angazhohemi që dialogu të mos rrëshqasë në dialog teknik por të fokusohemi në çështjen kryesore që është njohja reciproke e cila duhet të jetë edhe marrëveshja finale mes Kosovës dhe Serbisë”, ka thënë Hoti.
Më pas në mesditë, Hoti do të dalë në një konferencë në Kuvend për të dhënë edhe një rezyme të takimeve që ka zhvilluar gjatë kësaj kohe me palën serbe.
g.kosovari
