Teuta ka fituar 2-1 në fushën e Skënderbeut dhe është kthyer në zonën Europa League kur kanë mbetur edhe tri javë nga fundit i Superiores.
Skuadra e Shkëmbit, që vinte në këtë sfidë pas dy barazimeve, ka siguruar tri pikët falë golave të Sidibe (5′) dhe Bushic (54′). Krasniqi (84′) ka shënuar golin e vetëm për vendasit.
Kjo ka qenë humbja e dytë radhazi për korçarët, që mbeten në vendin e gjashtë me 46 pikë, pesë larg Teutës, që është ngjitur në vendin e tretë me 51 pikë.
Luftëtari ka hedhur një hap të rëndësishëm drejt mbijetesës falë fitores 3-2 të arritur në shtëpi kundër Kukësit.
Vendasit kanë gjetur golin e avantazhit pas vetëm 6 minutash lojë me Chanti-n, por miqtë kanë përmbysur gjithçka në pjesën e dytë, duke shënuar dy gola të shpejtë me Rrocën (50′) dhe William (57′).
Gjithsesi, Luftëtari nuk është dorëzuar dhe ka arritur të sigurojë tri pikë me dy golat e shënuar nga Dunga (74′) dhe Rapo (81′). Falë kësaj fitoreje, gjirokastritët janë ngjitur në vendin e shtatë dhe kanë shkuar pesë pikë larg zonës së ftohtë.
Kastrioti ka marrë një fitore të rëndësishme në luftën për mbijetesë pasi ka mundur 2-0 në shtëpi skuadrën e Flamurtarit.
Golat e Shehu (30′), Roger (55′) i kanë dhuruar tri pikët krutanëve, të cilët kanë shkuar tani vetëm dy pikë larg mbijetesës falë humbjes së pësuar nga Tirana në derbi.
Ndërkohë, kjo ka qenë humbja e tretë radhazi e pësuar nga Flamurtari, që ka zbritur në vendin e pestë të renditjes me 48 pikë, vetëm 3 larg zonës europiane.
