Avokati Naim Hasani, në një lidhje direkte me studion e “Dita Jonë” nga Bora Shahini dhe Rei Bezhani, në A2CNN, deklaroi se shifrat e publikuara nga tabloidet britanike për të burgosurt shqiptarë nuk reflektojnë realitetin.
“Tabloidet britanike kanë një fushatë të vazhdueshme kundër emigrantëve shqiptarë. “The Telegraph” i portretizon shqiptarët si kriminelë, si njerëz që shumica vijnë në Angli për t’u marrë me aktivitet kriminal. Shifrat që vendosin janë tronditëse, por duhet parë ky numër i të burgosurve në realitetin e përditshëm dhe me numrin e përgjithshëm të të burgosurve. Për ta përmbledhur, kjo gazetë mbështet ekstremin e djathtë dhe politikanin Nigel Farage, i cili nuk i ka kursyer epitetet ndaj shqiptarëve”, tha avokati.
Sipas avokatit, nga statistikat e Ministrisë së Brendshme të Britanisë së Madhe, “nga rreth 75 mijë të burgosur në vitin 2025, rreth 10 mijë kanë qenë të huaj. 1277 të burgosur kanë qenë shqiptarë. I bie një 7 të burgosur të huaj të jetë shqiptar”.
“Pa dyshim që është shumë, pasi nuk duam që asnjë shqiptar të reflektojë krimin, por shifrat e publikuara nga tabloidët nuk reflektojnë realitetin që jepet nga shifrat zyrtare. Kjo tregon tendencën për të gjetur material për tabloidet e ekstremit të djathtë”, u shpreh më tej avokati.
