Partizani shpallet zyrtarisht Kampion i Shqipërisë. Fitorja 2-1 në derbin e kryeqytetit i ka dhuruar “Të Kuqve” titullin e 16-të kampion në Kategorinë Superiore pas plot 26 viteve pritje.
Skuadra e udhëhequr nga trajneri Skënder Gega ka qenë e pandalshme për bardheblutë, dhe gjithashtu e pandikueshme nga luhatjet e Kukësit në anën tjetër, që fillimisht përmbysi avantazhin e Luftëtarit, për të lëshuar në fund gjithçka në favor të gjirokastritëve.
Një triumf i Partizanit, mes spektaklit të kuq që në derbi mbajti vetëm një emër, “Çinari”, protagonist kryesor i duelit, me dy gola personal, që kanë shfuqizuar çdo përpjekje të Tiranës, e cila pas javës së 33-të, me 3 javë nga fundi i kampionatit përjeton sërish rrezikun e fundit të klasifikimit, teksa renditet vetëm dy pikë mbi Kastriotin e vendit të fundit.
Ishin pikërisht të kuqtë ata që kaluan të parët në avantazh kundër Tiranës në minutën e 29-të. Skuadra e Gegës ka gjetur golin e epërsisë me një gjuajtje të mrekullueshme të Çinarit, duke dhënë sinjalin e parë të hipotekimit të titullit kampion.
Një epërsi provizore kjo që ka zgjatur vetëm 11 minuta, pasi Tirana ka barazuar derbin në minutën e 41’-të me Grecën, por edhe ky një rezultat i përkohshëm.
