Ekipet e kërkim-shpëtimit po vijojnë operacionin për të gjetur të mbijetuarit, pasi dy tërmete të fuqishme goditën Venezuelën pranë kryeqytetit Caracas, duke lënë pas të paktën 235 viktima dhe mbi 4,300 të plagosur.
Sipas Shërbimit Gjeologjik të SHBA-së (USGS), tërmeti i parë me magnitudë 7.2 u pasua vetëm pak sekonda më vonë nga një tjetër edhe më i fuqishëm, me magnitudë 7.5. Të dy lëkundjet ishin të cekëta, me epiqendra në thellësi 20.3 dhe 10 kilometra, çka ndikoi në rritjen e nivelit të shkatërrimit.
Autoritetet druhen se numri i viktimave mund të rritet, ndërsa shumë persona rezultojnë ende të zhdukur. Qindra familje kanë mbetur pa strehë, ndërsa shumë banorë po kalojnë natën në rrugë nga frika e shembjes së ndërtesave të dëmtuara.
Tërmetet goditën në orën 18:04 sipas kohës lokale (22:04 GMT) të mërkurën, në një ditë feste kombëtare, kur shumica e qytetarëve ndodheshin në banesat e tyre.
Presidenti i Asamblesë Kombëtare, Jorge Rodríguez, bëri të ditur se numri i viktimave është rritur, ndërsa presidentja e përkohshme Delcy Rodríguez shpalli gjendjen e jashtëzakonshme në vend.
250 ndërtesa të dëmtuara
Sipas autoriteteve, rreth 250 ndërtesa janë dëmtuar ose janë shembur plotësisht, kryesisht në qytetin e La Guaira. Mes tyre ndodhet edhe një hotel 10-katësh, i cili u shndërrua në rrënoja.
Dëme të konsiderueshme janë raportuar edhe në disa shtete të tjera të vendit, përfshirë Trujillo, Yaracuy, Carabobo, Aragua dhe Miranda.
Në zonën metropolitane të Caracasit, kryebashkiaku i Chacao, Gustavo Duque, tha se nga shembja e një ndërtese kanë humbur jetën 11 persona, ndërsa 23 të tjerë janë nxjerrë të gjallë nga rrënojat. Ai deklaroi se ekipet po punojnë pa ndërprerje për të larguar mbeturinat dhe për t’u krijuar mundësi specialistëve të arrijnë tek personat që mund të jenë ende gjallë.
Ndihma ndërkombëtare
Pas katastrofës, disa vende kanë ofruar mbështetje për Venezuelën. Shtetet e Bashkuara kanë premtuar 150 milionë dollarë ndihmë, ndërsa ushtria amerikane po dërgon avionë dhe anije transporti për të mbështetur operacionet e kërkim-shpëtimit dhe ndihmës humanitare.
