Gazetari Ardit Rada komentoi në “Ora e fundit” protestat në Tiranë dhe përplasjet në distancë mes Edi Ramës dhe organizatorëve të tyre. Rada tha se kryeministri nuk ka bërë asnjë zbulim kur ka ngritur akuza për njerëz të ndikuar nga vende armike, si pjesë të tubimeve në Tiranë.
“Çfarë tha Edi Rama në fillim? Që po, ka njerëz të ndikur nga vende armiqësore ndaj Shqipërisë që po shfrytëzojnë sinqeritetin e një proteste që nisi për flamingot dhe përfundoi me thirrje për përmbysjen e rendit kushtetues. Sepse vetë pesë pikat e lexuara nga Dritan Goxhaj këtë kërkojnë. Tani të kthehemi tek armiqtë apo dashakeqët. A nuk ishte Athina që reagoi që ditën e parë të protestës dhe Rama pati një replikë të gjatë me Aleksis Cipras? Si ndodhi që erdhi protesta nga Zvërneci në Tiranë? Pse nuk u distancuan nga Athina protestuesit apo i dhunuari? A nuk u dolën parrulla kundër izraelit në protestë që ditët e para derisa kulmoi me dhunimin e ambasadës izraelite dhe flamurin e saj? Sot a kemi një zonjë të shpallur non-grata që s’ka lënë protest pa ndërhyrë dhe që ka foto me presidentin më anti-perëndimor që ka patur Irani, Mahmud Ahmedinexhad. Nuk ka asgjë për t’u habitur. Shërbimi Informativ, por edhe neve në rrethet e gazetarëve i dimë kolegët që paguhen nga Irani. Sikurse dhe aktivistët. Me emra dhe mbiemra i dimë sesi paguhen me kriptomonedha nga Irani, me idenë se është një formë e sigurt për t’u fshehur. Sherbimi Informativ dhe autoritetet i dinë akoma edhe më mirë. Se këtu harrohet që para 4 vitesh pati një përplasje në Durrës në një panair libri. Shkuan muxhahedinët e Manzës dhe rrahën disa gazetarë pikërisht se kishin publikuar dhe reklamuar në panair literaturë pro-ajatollahut. E mbani mend këtë episode? Aty i keni disa gazetarë e aktivistë që mbronin vijën e islamit politik dhe muxhahedinët duke patur informacion për financimin e tyre shkuan dhe i goditën etj. Irani vetëm ambasadë fizikisht nuk ka në Shqipëri, por kontaktet përmes rrjeteve sociale i ruan dhe është në taktikën e shërbimeve të atij shteti të joshë sa më shumë element përmes pagesave të konsiderueshme”, tha Ardit Rada për “Ora e fundit” në ABC News.
I pyetur për ndërhyrjen e Partisë Demokratike në protestat e qytetarëve, Rada u shpreh se kemi të bëjmë me përpjekje të kota. Gazetari shtoi se më i godituri nga kjo që po ndodh është Sali Berisha dhe jo qeveri.
“PD ka marrë goditjen më të madhe nga protestat. Së pari u dogji kartën se njerëzit nuk dalin në shesh nga frika e regjimit. Së dyti u dogji kartën se njerëzit nuk rrinë në shesh me ditë të tëra pasi lodhen Dhe së treti, i zuri sheshin Sali Berishës që s’ka se ku të bëjë më foltoret e tij me 30 vetë. Pati një përpjekje të shëmtuar nga PD duke çuar të fortët e saj mes turmës, gjë që u përbuz nga qytetarët. Tani e gjithë përpjekja e Sali Berishës është që të zhdukë parrullën “Berisha në burg”. Për këtë po dërgon njerëz tek-tuk me parrulla ku mungon Berisha që të duket sikur indinjata është vetëm me Edi Ramën. Problemi është që kjo protest nxjerr apo jo një lider apo një parti politike, në thelb i ka dhënë shkelmin opozitës në vend. Ishte gabim taktik që nuk pranuan dialog me qeverinë për flamingot dhe projektin, siç pretendohej në fillim. Tani edhe protestuesit kanë ngecur në shesh, edhe Berisha ka mbetur pa shesh. Dhe kur të shuhet vetëvetiu protesta, veç opozita s’do jetë në normalitet”, u shpreh më tej Rada për ABC News.
