Tërbuni-Bylis është nën hetim nga Federata Shqiptare e Futbollit. Zëdhënësja Jona Dervishi konfirmoi se takimi i javës së 11-të Kategorisë Superiore, luajtur të mërkurën, do të jetë pjesë e hetimeve të Komisionit të Etikës, një organ të krijuar enkas disa vite më parë për të luftuar manipulimin e rezultatit të ndeshjeve.
Në këtë mënyrë Komisioni i Etikës do të vihet në lëvizje për takimin e luajtur në Pukë dhe që përfundoi me rezultatin 4-2 për Tërbunin, duke shqyrtuar fillimisht raportet e zyrtarëve të ndeshjes si dhe pamjet filmike. Komisioni pritet të mblidhet pas pak ditëve për të shqyrtuar që la një shije veçanërisht të keqe për mënyrën e pësimit të golave nga të dyja skuadrat. Pritej një duel mbijetese mes dy skuadrave që rrezikojnë rënien nga Kategoria por në fakt rivaliteti në fushë mungoi, duke ja lënë vendin një teatri të shëmtuar dhe të luajtur keq.
Mbrojtjet e Tërbunit dhe të Bylisit ishin thjesht inekzistente në momentin e sulmeve kundërshtare. Zv/Trajneri i Bylisit Maringlen Kule në intervistën pas ndeshjes në Supersport mohoi që ndeshja të jetë trukuar, duke u përpjekur të justifikohet me shprehje se skuadra e tij thjesht ishte në një ditë të keqe por gjithsesi pa mundur të bindë opinionin sportiv me tifozët që kanë shpërthyer menjëherë në akuza për trukim në rrjetet sociale.
Në orët e vona të mbrëmjes së të mërkurës ka ardhur dhe konfirmimi nga FSHF që ka vendosur nisjen e një procesi në lidhje me Tërbuni-Bylis.
Nëse dy skuadrat gjykohen si fajtore për manipulim rrezikojnë sanksione të rënda duke nisur që nga heqja e pikëve në klasifikim e deri te zbritja nga Kategoria.
