Altin Hajri, pronari i resortit “Golden” në Shijak, i cili sot është një nga personat më të kërkuar të policisë, në fund të dhjetorit 2019 është deklaruar i pafajshëm nga Gjykata e Apelit në Durrës për akuzën e vrasjes me dashje mbetur në tentativë. Burime për Report Tv bëjnë me dije se Altin Hajri që tashmë është i shpallur në kërkim si i dyshuar për pengmarrjen dhe më tej vrasjen e Jan Prengës, fillimisht u dënua me 7 vite burg nga gjykata e shkallës së Parë në Durrës për tentativë vrasje të M.Ballës. Por vendimi i apelit i hoqi Altin Hajrit në fund të dhjetorit që lamë pas dënimin me 7 vjet burg.
Para se të jepej vendimi i pafajsisë nga Apeli i Durrësi në fund të dhjetorit, Altin Hajri ishte i shpallur në kërkim ishte i kërkuar nga drejtësia pasi në qershor të 2017-ës, ai është dënuar në mungesë me 7 vite burg nga Gjykata e Shkallës së Parë në Durrës, për vrasje të mbetur në tentativë dhe armëmbajtje pa leje. Ngjarja e rëndë ndodhi më 24 dhjetor të vitit 2017, ku Altin Hajri ka tentuar të vrasë M.Ballën, bashkëfshatarin e tij në Pjezë, me të cilin i kanë shtëpitë vetëm 20 metra larg.
Hajri e kishte punësuar Ballën së bashku me djemtë e tij, për të bërë punimet hidraulike në resortin “Golden”, por nuk kishte shlyer ndaj tyre një pagesë 2-3 mijë euro për punimet. Sipas dëshmisë së M.Ballës dhe djemve të tij, ata kanë kërkuar të takojnë Altin Hajrin për t’i marrë paratë, por nuk e kanë gjetur në resort, ndërsa shpesh u thuhej se Hajri nuk ndodhej në Shqipëri.
E çuditshmja në këtë proces gjyqësor, ku Altin Hajri është gjykuar në mungesë, është fakti se M. Balla ka ndryshuar dëshminë e dhënë para oficerëve të policisë gjyqësore, ku e ka identifikuar Altin Hajrin, me atë dhënë para gjykatës. Ai ka thënë se pranë portës së shtëpisë së Hajrit ishin 3-4 persona ku ai nuk ka identifikuar asnjërin prej tyre. Por gjykata ka vlerësuar se dëshmia që duhet marrë provë në gjyq është ajo e dhënë para oficerit të policisë gjyqësore.
Ndërkohë Altin Hajri është një ndër personat e shpallur në kërkim nga policia për ngjarjen e rëndë kriminale të ndodhur më 17 janar 2020 në Kamzës. Ai dyshohet se ka rrëmbyer Jan Prengën në Kamëz, në bashkëpunim me persona të tjerë, duke e dhunuar rëndë dhe më tej e kanë transportuar drejt kompleksit të dasmave në pronësi të tij, “Golden” ku dyshohet edhe të ketë ndërruar jetë si pasojë e plagëve, ndërsa trupin e kanë fshehur ku ende policia nuk ka mundur ta gjejë./shqiptarja.com
g.kosovari
