Forcat Shqiponja kanë arrestuar rreth orës orës 01:50 një 40-vjeçar që lëvizte me automjetin e tij pa targa në Vlorë. Ai nuk iu bind urdhrit të patrullës Shqiponja për të ndaluar, por u largua me shpejtësi në brendësi të lagjes “Isa Boletini”. Burime nga policia e Vlorës bëjnë me dije se gjatë ndjekjes 40-vjeçari me iniciale H.H ka ka rrezikuar jetën e efektivëve të policisë duke tentuar t’i përplasë me automjet.
Shërbimet e Shqiponjave dhe të Rendit janë vënë në ndjekje të personit i cili ishte i maskuar, duke bërë të mundur ndalimin e tij. Në momentin e prangosjes ky shtetas tha se ishte konfliktuar në një lokal në qytetin e Vlorës dhe për këtë arsye ishte maskuar dhe kishte hequr targat e mjetit.
Gjatë kontrollit të mjetit tip Porsche ngjyrë blu, u gjet një maskë, 1 mjet prerës thikë dhe targat e automjetit.
Gjate testit të kryer nga qarkullimi rrugor rezultoi se personi kishte konsumuar alkool. Në momentin e ndalimit u konstatua se personi kishte hematoma në fytyrë dhe kërkoi ndihmë mjekësore. Sipas tij ai ishte konfliktuar fizikisht me disa persona në një lokal në qytet.
Më pas u shoqërua për ndihmë ne spitalin rajonal Vlorë ku dhe u shtrua për analiza të metejshme dhe ruhet nga patrulla e rendit.
/a.r
