Një 33-vjeçar është arrestuar nga Policia e Tiranës, pasi ka tentuar të përdhunojë fqinjën e tij, 30 vjeç, shkruan Panorama. Ngjarja ka ndodhur në Kamzë, në mes të ditës, dhe fatmirësisht është parë nga disa kalimtarë të rastit, që kanë mundur të njoftojnë në kohë në sallën operative, duke parandaluar ngjarjen.
Burimet thanë se autori i ngjarjes është shtetasi me iniciale E.K., i proceduar disa herë nga Policia dhe ish-i dënuar për vjedhje. Ndërsa e dëmtuara, e cila është e martuar dhe ka një fëmijë të mitur, jeton me familjen shumë pranë banesës së autorit.
Rreth orës 12:30 të së dielës, 30-vjeçarja po kthehej në shtëpi, kur në një rrugicë të ngushtë që ndodhet vetëm pak metra larg banesës së saj, ajo është ndeshur në rrugë me fqinjin. Ajo e ka përshëndetur si zakonisht, duke qenë se njiheshin, por veprimet e tij nuk kanë qenë ato të zakonshmet.
33-vjeçari është kthyer mbrapsht dhe ka ecur përkrah saj për disa metra. Pak para se t’i afroheshin shtëpisë, ai ka nisur ta ngacmojë seksualisht dhe më pas ka tentuar t’i grisë rrobat.
Gruaja nisi të kërkojë ndihmë, ndërsa autori i ka mbyllur gojën me dorë, duke tentuar ta shtrijë përtokë. Fatmirësisht në atë moment kanë qenë duke kaluar në rrugë disa dëshmitarë, të cilët kanë nxituar t’i telefonojnë Policisë në sallën operative. Në një kohë shumë të shpejtë patrullat e Komisariatit nr.5 kanë mbërritur në vendin e ngjarjes, duke bërë të mundur arrestimin në flagrancë të autorit E.K.
Ai është shoqëruar në Komisariatin e Kamzës ku është marrë në pyetje, ndërsa e dëmtuara ka bërë edhe kallëzim me shkrim për ngjarjen.
I dyshuari ka tentuar të justifikohet duke thënë se ishte nën efektin e alkoolit dhe kishte dalë jashtë kontrollit. Megjithatë, burime zyrtare të Policisë së Tiranës thanë se ai është arrestuar për ngacmim seksual dhe tentativë përdhunimi.
