Ambasada e SHBA-së në Jordani u bëri thirrje amerikanëve të marrin në konsideratë largimin nga Lindja e Mesme nëse tensionet rajonale përshkallëzohen.
“Amerikanët që ndodhen aktualisht në Lindjen e Mesme duhet të tregojnë kujdes dhe vigjilencë të shtuar, si dhe duhet të jenë të përgatitur për anulime fluturimesh, mbyllje periodike të hapësirës ajrore dhe ndërprerje të mundshme të udhëtimit”, tha ambasada në një njoftim sigurie në X.
Gjithashtu, u këshilloi amerikanëve jashtë Lindjes së Mesme që “të rishqyrtojnë seriozisht udhëtimet për në dhe përmes rajonit”.
Ambasada paralajmëroi se “Irani dhe grupet mbështetëse të Iranit mund të synojnë interesa të tjera të SHBA-së jashtë shtetit” dhe e përshkroi situatën në Lindjen e Mesme si “fluide”.
“Ambasada Amerikane në Aman këshillon të gjithë amerikanët të shmangin udhëtimet në bazat ushtarake në Jordani”, shtoi ajo, duke u bërë thirrje qytetarëve të monitorojnë paralajmërimet zyrtare dhe të ndjekin udhëzimet nga autoritetet jordaneze.
Paralajmërimi erdhi mes tensioneve të larta midis SHBA-së dhe Iranit, ndërsa mediat raportojnë duke cituar zyrtarë se Uashingtoni po planifikon sulme të reja ndaj Iranit këtë fundjavë.
