Kur kanë kaluar gjashtë ditë nga zhdukja e Adriano Jahos dhe Ariseld Mazes nga Vlora, policia nuk ka asnjë sinjal për vendndodhjen e tyre.
Edhe pse nuk ka një denoncim zyrtar, policia e Durrësit po vijon hetimet, pasi familjarët kanë deklaruar se ata janë nisur nga Durrësi.
Në këto kushte, krahas kërkimeve, policia e Durrësit ka nisur hetimet për zbardhjen e ngjarjes së rëndë.
Me gjithë angazhimin maksimal te strukturave të ndryshme për gjetjen e tyre, deri sot fati i tyre mbetet mister.
Deri dje kërkimet ishin fokusuar në drejtime të ndryshme nga toka, ajri dhe deti, por rezultuan të dështuara.
As skafi dhe asnjë shenjë nga dy vlonjatët e zhdukur, të cilët dyshohet se kanë dalë në det në bregdetin e Durrësit me datën 3 korrik.
Në kushtet kur nuk ka asnjë shenjë të skafit dhe dy të zhdukurve, policia e Durrësit ka ngritur pistat e hetimit: atë të mbytjes në det dhe të zhdukjes së qëllimtë të dy vlonjatëve.
“Kemi nisur hetimet duke i fokusuar ne dy pista: atë te mbytjes në det dhe të zhdukjes së qëllimtë”.
Sipas kapitenerisë së Durrësit, në kohen që rezulton të jenë zhdukur dy vlonjatët deti ka qenë shumë i trazuar.
Të njëjtat burime thonë se nga data 2-3 korrik dhe deri në datën 5, anijet e peshkimit nuk kanë dalë në det pasi deti ka qenë shumë i trazuar./oranews
a.ç
