Dy muaj para hyrjes në fuqi të ligjit për zhvendosjen e lojërave të fatit dhe kazinove në periferi të qytetit dhe qëndrimin e basteve sportive vetëm në një distancë 200 metra nga shkollat dhe institucionet e kultit, një grup deputetësh kërkojnë shtyrjen e zbatimit të ligjit deri në 2 vjet.
I pyetur nga kryetari i Komisionit të Ekonomisë, Erjon Braçe, nëse janë parashikuar efektet në buxhet të zbatimit të ligjit të ri për lojërat e fatit, ministri Ahmetaj shpjegoi edhe kërkesën e deputetëve drejtuar Komisionit të Ligjeve.
“Nga 1 janari i këtij viti hyn në fuqi ligji për lojërat e fatit që parashikon një mbyllje totale të të gjitha lojërave elektronike dhe kufizimin e sistemit të basteve. A janë parashikuar këto efekte në të ardhurat e vitit të ardhshëm?”, deklaroi Braçe.
Për të ardhurat nga lojërat e fatit ministri u shpreh: “Në buxhet, siç e shikoni, nuk kemi planifikuar të ardhura nga lojërat e fatit, për shkak se kemi parashikuar mbylljen e tyre. Në dijeninë time, këto ditë një grup deputetësh ka kërkuar në Komisionin e Ligjeve shtyrjen me 1 apo dy vjet. Nuk gjykoj dot pasi është një procedurë parlamentare dhe është tagër përtej meje”, sqaroi ministri.
Por kryetari i Komisionit, Braçe, u shpreh se kërkesa duhet të kalojë në komisionin përgjegjës të ligjit. “Mbase mund të shkojë edhe në Komisionin e Integrimit, por ka një komision përgjegjës që merret me këtë punë”, u shpreh Braçe
