Partitë më të mëdha të qendrës dhe të majta në Rumani kanë arritur të ndalin rivalët prorusë pas fitores së tyre paraprake në raundin e parë.
Nacionalistët në zgjedhjet e së dielës morën 18 për qind të votave, duke u renditur pas Partisë Socialdemokrate të kryeministrit Marsel Çolaku, i cili siguroi gati 22,5 për qind të votave. Partneri i PSD-së, PNL-ja, doli e treta në radhë me 14 për qind të votave; grupi liberal USR në 12 për qind, ndërsa partia etnike hungareze UDMR mbi 6 për qind.
Analistët parashikojnë që qeveria e re do të jetë një koalicion mes PSD-së me partitë më të vogla.
“Ne duam një koalicion që të vazhdojë kursin europian të Rumanisë. Ne presim që partitë demokratike, proeuropiane të kuptojnë se Partia Socialdemokrate mund të jetë një fakt balancues rreth shumicës së ardhshme që do të formohet,” u shpreh zv.kryetari i socialdemokratëve, Viktor Negresku.
Rumania është shtet anëtar i Bashkimit Europian dhe i NATO-s, por vendi është futur në krizë politike pas zgjedhjeve të fundit presidenciale të 24 nëntorit, që nxorën fitues një kandidat të ekstremit të djathtë jo shumë të njohur më parë. Gjykata Kushtetuese e Rumanisë urdhëroi që votat të rinumërohen pas dyshimeve të shprehura nga aktorët e brendshëm se procesi mund të jetë manipuluar nëpërmjet ndërhyrjeve nga jashtë dhe TikTok-u – dyshimet bien te Rusia për shkak të qëndrimit të qeverisë rumune në favor të Ukrainës përballë Rusisë.
Gjykata sot do të vendosë a do të anulohet rezultati i zgjedhjeve presidenciale. /Reuters, FT
