Kryetari i Bashkisë së Himarës, Vangjel Tavo, ka publikuar këtë të premte, më 22 gusht, në rrjetet sociale pamje nga kamerat e sigurisë që tregojnë qytetarë dhe pushues duke hedhur mbeturina në rrugë dhe në trotuare, jashtë zonave të caktuara për grumbullimin e tyre.
Në postimin e tij, kryebashkiaku Tavo paralajmëron ndëshkime me gjoba për të gjithë shkelësit e rregullave të pastërtisë publike.
“Mbetjet në hapësirat publike, gjobë për këdo që ndot qytetin! Në videot e mëposhtme shihet qartë se qytetarë dhe pushues kanë hedhur mbeturinat në të njëjtin vend. Aty nuk ka një kosh për mbeturinat – është thjesht një trotuar! Madje aty ka edhe një tabelë ndaluese, por përsëri mbeturinat janë lënë pikërisht pranë saj. Kjo sjellje është e papranueshme, dëmton mjedisin, shëndetin publik dhe imazhin turistik të Himarës.”, shkruan kryebashkiaku.
Sipas Tavos, Bashkia ka nisur tashmë identifikimin e çdo individi apo subjekti që hedh mbeturinat në vende të paautorizuara, ndërsa inspektorët vendorë kanë filluar vendosjen e gjobave. Për ata që përsërisin shkeljen, parashikohen masa administrative edhe më të rënda.
“Bashkia Himarë ka nisur identifikimin e çdo individi dhe subjekti që hedh mbeturinat në vende të paautorizuara. Po vendosim gjoba ndaj tyre. Do të vijojmë me masa edhe më të rënda administrative për përsëritësit.
Himara është shtëpia jonë e përbashkët dhe një destinacion turistik i rëndësishëm. Ju ftojmë të gjithë, qytetarë e pushues, të respektoni hapësirat publike dhe të përdorni vetëm koshat dhe kontejnerët e dedikuar. Asnjë tolerim ndaj atyre që ndotin qytetin dhe hapësirat publike!”, shton ai.
