Sulmet e intensifikuara ruse me dronë dhe raketa kanë shkaktuar dëme të mëdha në Kiev, duke goditur infrastrukturë kritike dhe duke paralizuar përkohësisht trafikun në një nga urat kryesore të kryeqytetit ukrainas.
Një person është vrarë pasi një ndërtesë banimi u godit gjatë natës, sipas shërbimit ukrainas të emergjencave.
Kryebashkiaku i Kievit, Vitaliy Klitschko, e përshkroi situatën si “shumë dramatike”, duke paralajmëruar se sulmet po dëmtojnë infrastrukturën kritike, logjistikën, banesat dhe objekte të tjera të rëndësishme të qytetit.
Ura Pivdenny, një nga arteriet kryesore të transportit mbi lumin Dnieper, është goditur disa herë gjatë dy ditëve të fundit. Sipas autoriteteve, vetëm të premten ajo u godit përsëri nga një sulm me dron, duke e çuar në katër numrin e goditjeve brenda dy ditësh.
Si pasojë, trafiku i metrosë dhe i automjeteve mbi urë është pezulluar. Kufizime janë vendosur edhe në dy ura të tjera kryesore të Kievit, duke shkaktuar bllokime të mëdha trafiku në pjesë të ndryshme të qytetit.
Kievi ka një popullsi prej rreth tre milionë banorësh dhe një pjesë e madhe e tyre mbështeten në rrjetin e metrosë për transportin e përditshëm.
Pas sulmeve, këshilli i mbrojtjes i Kievit zhvilloi një takim urgjent me pjesëmarrjen e zyrtarëve të ushtrisë, sigurisë, shërbimeve të emergjencave dhe policisë.
“Po flasim për mbijetesë”, tha Klitschko gjatë takimit, duke akuzuar Rusinë se synon të shkaktojë panik dhe të dëmtojë funksionimin normal të kryeqytetit.
Sipas tij, Kievi do të vazhdojë të përballet me situatën përmes koordinimit të institucioneve dhe banorëve të qytetit.
Presidenti ukrainas Volodymyr Zelensky tha se Rusia po përpiqet të godasë një gamë të gjerë të infrastrukturës ukrainase.
Në një fragment të një interviste për Financial Times, Zelensky tha se objektivat përfshijnë ura, qendra të të dhënave, internetin, rrjetet celulare, spitale, kopshte, shkolla dhe universitete.
Sipas tij, synimi është që sulmet të krijojnë kushte që banorët të largohen nga qytetet e tyre.
