Pas shpalljes së tarifave universale për të gjithë mallrat e importuara, presidenti i SHBA-ve, Donald Trump, ka reaguar përmes një postimi në platformën “Truth Social”.
Në mesazhin e tij, presidenti amerikan e krahason vendin me një pacient që doli i gjallë nga një operacion i vështirë dhe tani është në fazën e rikuperimit.
“Operacioni përfundoi! Pacienti mbijetoi dhe po shërohet. Prognoza është se pacienti do të bëhet shumë më i fortë, më i madh, më i mirë dhe më elastik se kurrë”, ka shkruar Trumo në mënyrë karakteristike, duke dërguar mesazhin e tij të optimizmit për SHBA-të.
Ai e përfundoi postimin me sloganin e tij të njohur: “Make America Great Again” (Ta bëjmë Amerikën sërish të Madhe).
Presidenti i Shteteve të Bashkuara, Donald Trump, njoftoi të mërkurën se SHBA-ja do të vendosë një tarifë bazë prej 10 për qind për importet nga të gjitha vendet e botës, përfshirë edhe Shqipërinë.
Ai njoftoi gjithashtu për tarifa më të larta për dhjetëra vende që kanë suficit tregtar me Shtetet e Bashkuara, duke rritur rrezikun për një luftë tregtare dhe rritje të inflacionit.
Ndaj mallrave të importuara nga Kosova është vendosur tarifë prej 10 për qind, ndaj atyre nga Shqipëria 10 për qind, Serbia 37 për qind, Bosnia e Hercegovina 35 për qind, dhe Maqedonia e Veriut 33 për qind.
Duke folur në Shtëpinë e Bardhë, Trump tha dje se ndaj importeve nga Kina do vendoset tarifë prej 34 për qind, ndaj atyre nga Bashkimi Evropian 20 për qind, Korea e Jugut 25 për qind dhe Japonia 24 për qind.
Zyrtarë të lartë të Shtëpisë së Bardhë u thanë gazetarëve se tarifa bazë prej 10% do të hyjë në fuqi më 5 prill, ndërsa tarifat reciproke do të hyjnë në fuqi pas një jave, më 9 prill.
Trumpi shpalli emergjencë ekonomike kombëtare për t’i zbatuar tarifat, të cilat pritet të prodhojnë qindra miliarda dollarë të ardhura vjetore.
