Ministri i Punëve të Brendshme, Besfort Lamallari, nënvizoi progresin e Shqipërisë në ndryshimet e fundit të Kodit Penal dhe përparimet në integrimin europian, duke e vlerësuar punën e Policisë së Shtetit dhe ngritjen e Zyrës për rikuperimin e aseteve si hapa të rëndësishëm.
Ai theksoi gjithashtu sukseset në luftën kundër drogërave dhe përmirësimin e politikave humane për rehabilitimin, duke e çuar Shqipërinë në tryezën europiane.
“Të qenit pjesë e familjes euroipiane do të thotë që kufijtë e Shqipërisë i përkasin Evropës së bashkuar. Është konsideruar një punë e mirë sa i takon kapitullit numër 24. Punë e Policisë së Shtetit është vlerësuar. Zyra për rikuperimin e aseteve është një vlerë e shtuar. Nga ana tjetër kemi zhvillime shumë të rëndësishme që janë njohur edhe nga vendet anëtare dhe ka të bëjë me luftën kundër drogërave. U përshëndet edhe nga BE fakti që ne ngritëm një zyrë për shkëmbimin e informacioneve për drogat. Duke e çuar çështjen jo vetëm në aspektin e arrestime, por edhe të rehabilitimeve, duke e çuar në një çështje më shumë humane. Shqipëria ka fatin që për herë të parë të ulet në tryezën e politikave, edhe në statusin e vëzhguesit për shkak se ne ende nuk jemi anëtarë. Kjo është vërtet pozitive, pasi e sjell Shqipërinë në tryezën europiane.”
Lamallari shtoi se reformat në Kodin Penal, sidomos ato që lidhen me mbrojtjen dhe sigurinë e fëmijëve, janë në përputhje me standardet e Bashkimit Europian dhe theksojnë rëndësinë e Shqipërisë për të qenë pjesë e projektit europian të sigurisë.
“Nga ana tjetër siç ju e dini kemi bërë progres në Kodin Penal, që kaluan në muajin e kaluar, sipas standardeve të BE. Çështje që lidhen me mbrojtjen dhe sigurinë e fëmijëve. Ky është një proces që vazhdon. Edhe në raportin më të fundit të këtij institucioni është vlerësuar kontributi që Shqipëria ka dhënë. Shqipëria ka bërë progres në linjësimin me politikën e vizave. Nuk kemi kohë për të humbur. Është në interesin e Shqipërisë që të jetë në gjirin e familjes europian. Projekti europian është edhe një projekt sigurie.”
