Spiro Dhimaleksi, 35 vjeç, i cili një ditë më parë mbajti peng dhe kërcënoi jetën e prindërve të tij në Himarë, pas trajtimit mjekësor në Spitalin e Vlorës për plagë të shkaktuara me thikë, është shtruar sot në Spitalin Psikiatrik “Ali Mihali”, ku po mbahet nën observim.
Sipas mjekëve psikiatër, Dhimaleksi nuk ka kartelë me diagnozë të problemeve të shëndetit mendor, por rezulton përdorues i lëndëve narkotike në fazë të rënduar. Ata kanë bërë të ditur se 35-vjeçari ka qenë më i kthjellët gjatë komunikimit, por do të duhet të trajtohet nga toksikologë.
Në dëshminë e dhënë për policinë, Dhimaleksi ka deklaruar se veprimin e ndërmori pasi dyshonte se prindërit e tij donin t’i merrnin pronat.
Ngjarja ndodhi në Himarë, ku ai, në gjendje të rënduar psikologjike, kishte izoluar prindërit e tij, 60 dhe 65 vjeç, duke i kërcënuar me thikë se do t’i vriste. Menjëherë pas marrjes së njoftimit, forcat e policisë ndërhynë dhe nisën negociatat me autorin. Pas më shumë se një ore, një efektiv i zonës arriti të komunikojë drejtpërdrejt me Dhimaleksin, duke ulur tensionin.
Në momentin e ndërhyrjes, 35-vjeçari tentoi të dëmtonte veten me thikë, duke shkaktuar plagë në bark, por policia reagoi menjëherë, e neutralizoi dhe i hoqi mjetin prerës, duke shpëtuar prindërit pa lëndime.
Pas shoqërimit në Komisariatin e Himarës dhe trajtimit në Spitalin e Vlorës, Dhimaleksi është referuar për kujdes psikiatrik. Ndërkohë, prindërit e tij janë marrë në pyetje për të sqaruar rrethanat e ngjarjes.
