Kryeministri grek Alexis Tsipras pritet të takohet me Presidentin e Komisionit Evropian Jean-Claude Juncker sot në mbrëmje në Bruksel. Para takimit zoti Tsipras u bëri thirrje kreditorëve ndërkombëtarë të vendit që të jenë realistë dhe të luajnë rolin e tyre për të arritur një marrëveshje që do t’u jepte fund spekullimeve për largimin e vendit të tij nga Eurozona. Megjithatë Komisioni Evropian thotë se nga takimi i sotëm nuk pritet ndonjë marrëveshje.
Komisioneri Juncker e ka ftuar kryeministrin Tsipras për të diskutuar ecurinë e negociatave mes Greqisë dhe partnerëve ndërkombëtarë, sipas komisionit.
“Puna intensive vazhdon në të gjitha nivelet për një marrëveshje që të pasojë programin aktual. Sot nuk presim ndonjë rezultat përfundimtar. Ky është një diskutim i parë, jo përfundimtar”, tha zëdhënësi i Komisionit Evropian, Margaritis Schinas.
Zoti Schinas tha se ky është një moment i rëndësishëm, pasi janë krijuar kushtet që do ta lejonin Eurogrupin që vinte në fazën e një diskutimi përfudimtar.
Por kryeministri grek Tsipras tha para takimit se qeveria greke e ka dorëzuar zyrtarisht propozimin “për një kompromis me përfitim reciprok” dhe se synimi i vizitës së tij në Bruksel ishte për të diskutuar këtë propozim dhe për t’i dhënë fund bllokimit nga huadhënësit.
“Do t’i shpjegoj zotit Juncker se sot më shumë se kurrë është e nevojshme që institucionet dhe kryesisht udhëheqësit politikë të Evropës, të përqafojnë realizmin që ka dëshmuar pala greke gjatë tre muajve të fundit, duke negociuar të drejtat e popullit grek për të mirën e një Evrope të bashkuar, që sot është më e nevojshme se kurrë më parë”.
Ai shtoi se deri sot, pala greke nuk ka marrë asnjë koment për propozimin apo për dokumenta të tjera nga ana a partnerëve ndërkombëtarë.
Greqia nuk ka marrë fonde nga kreditorët e saj kryesorë, FMN-ja, Banka Qendrore Evropiane dhe vendet e Eurozonës që nga gushti i kaluar.
Më 5 qershor, ajo duhet t’i kthejë FMN-së 300 milionë Euro, por zëdhënësi i grupit parlamentar të Syrizës tha sot se ky afat do të skadojë pa pagesë, nëse nuk ka një perspektivë për një marrëveshje ndihmash në këmbim të reformave me kreditorët.
