Çështja e rihapjes së hetimeve për Skënderbeun dhe rritja e mundshme e masës ndëshkimore për kampionët e Shqipërisë ka ngjallur mjaft interes edhe në mediat ndërkombëtare. Agjencia e lajmeve AP ka intervistuar numrin 1 të klubit korçar, Ardian Takaj, i cili ka konfirmuar se nuk kishte asnjë lloj informacioni mbi deklaratat e shefit të Komisionit të Disiplinës në UEFA, Emilio Garcia.
“Nuk na ka lajmëruar kush. Ne besonim se çështja jonë ishte mbyllur me dënimin”, ishin fjalët e Takajt, i cili gjithashtu ka ende pretendime për vendimin e parë, edhe pse u mbajt në fuqi nga CAS.
“Sigurisht që ne nuk e aprovojmë vendimin që erdhi pa asnjë lloj evidence. Por ne përsëri menduam se çështja kishte përfunduar me atë pezullim”, vijon ai.
Skënderbeu mund të përballet me një tjetër betejë ligjore, nëse UEFA vendos të rritë masën ndëshkimore ndaj tij. Por Takaj shpjegoi se për momentin, klubi nuk mund të përgatitet për asgjë rreth të cilës nuk ka një njoftim zyrtar nga ndërkombëtarët.
“Është detyra e tyre të hetojnë, por duhet të na tregojnë dhe kjo duhet të na vijë në rrugë zyrtare”, u shpreh ai.
Shqiptarja.com/d.i.
