Forca e ligjit është e vetmja mënyrë për të pasur punësim dhe rritje të ekonomisë për familjet shqiptare”, deklaroi sot nga Kamza, kryetari i Partisë Socialiste të Tiranës, Saimir Tahiri. I shoqëruar nga deputeti Sadri Abazi dhe Kryetari i ALUIZN-it Artan Lame, Tahiri zhvilloi një takim me të rinj në zonën e Kamzës ku deklaroi se është një qytet që ka mbetur peng i politikës
. Duke u ndalur tek reformat e kryera këtë mandat qeverisës, Tahiri nënvizoi se zgjidhja është tek ndërtimi i një shteti funksional. Ai kërkoi veçanërisht nga të rinjtë t’i bashkohen Partisë Socialiste e të hedhin prapa krahëve mbështetjen për parti, që u kanë marrë vetëm votën dhe i kanë gënjyer.
“Partia Socialiste ka nisur një rrugë. Ishte rruga më e vështirë. Ne sigurisht mund të bënim atë që kishte bërë gjithkush më përpara. Të mos lëviznim asgjë. Problemet t’i linim aty ku ishin dhe të vazhdonim historinë si të gjitha ata që ishin përpara. Kjo ishte rruga më e lehtë, pa kokëçarje, pa debate, por ishte rruga më e vështirë për qytetarët. Ne zgjodhëm rrugën e reformave. Ne zgjodhëm rrugën më të vështirë. I hymë me themel gjithçkaje që trashëguam në njëzet e kusur vite dhe bashkë me Kryeministrin Edi Rama po çojmë përpara punë, të cilat deri dje nuk janë bërë kurrë”, u shpreh ministri i Brendshëm.
Deputeti socialist Sadri Abazi u shpreh se e ardhmja do të jetë e sigurt për këtë zonë, vetëm kur të rinjtë të vendosin vetë për të.
Kryetari i ALUIZN-it Artan Lame theksoi se në këtë mandat janë kryer rreth 100 mijë legalizime, ose 6 herë më shumë se në 8 vitet e qeverisë “Berisha”.
“Legalizimi është hapi parë për atë pjesë ku duhet të jeni ju pjesëmarrës, pjesën për ta kthyer Kamzën në qytet të mirëfilltë. Legalizimet janë hapi i parë drejt asaj faze. Janë hapi i parë për të pajisur Kamzën dhe të gjithë Shqipërinë, sepse ky është proces në të gjithë vendin me infrastrukturën, me ujësjellësat e të tëra”, tha Lame. /b.d
