Partia Demokratike, ka përshëndetur sot nisjen e punimeve për ndërtimin e gazsjellësit TAP, duke nënvizuar se kjo është meritë e qeverisë së PD-së në shërbim të ekonomisë dhe punësimit. Deputetja e PD-së, Jorida Tabaku, në një dalje mediatike, ka akuzuar kryeministrin Rama se është bërë qesharak, pasi jo vetëm që nuk përmend asgjë për punën e mëparshme, por i kapur rëndë nga sindroma e vitit zero flet sikur projekti lindi ditën që ai erdhi në pushtet.
“Ekonomia shqiptare ende vazhdon të mbahet në patericat e investimeve të qeverisë së shkuar sepse vetë Edi Rama ka të tjera prioritete: pasurimin e tij dhe oligarkëve të tij përmes tenderave dhe koncesioneve korruptive me paratë e taksave të rritura të shqiptarëve. Ekonomia sot reflekton plotësisht dështimin e zotimeve që ky kryeministër bëri 3 vjet më parë. Edi Rama ka mbi supe damkën e rënies së investimeve të huaja me 57 mln euro më pak (5.7%) në raport me vitin zgjedhor 2013”, ka theksuar Tabaku.
Sipas saj sot fatkeqësisht Shqipëria nuk është më një vend atraktiv për investimet e huaja ashtu siç e kanë konfirmuar edhe investitorët gjermanë apo amerikanë, pasi asnjë investitor strategjik nuk ka ardhur e nuk do të vijë në qeverisjen e Edi Ramës. Shumë prej tyre janë larguar dhe të tjerë janë bërë gati të ikin.
“Kjo sepse Shqipëria vuan nga korrupsioni i përhapur gërryes siç thotë Departamenti Amerikan i Shtetit, dhe është vendi me taksat më të larta në rajon siç thotë raporti i Freedom House. Sot në Shqipëri për herë të parë në 6 vitet e fundit konsumi ka rënë në vlera negative. Shqipëria ka nivelin më të ulët të besimit ndër biznese e konsumatorë në 15 vitet e fundit, siç thotë Banka e Shqipërisë. Shqipëria e fundit në rajon sa i takon transformimit, siç edhe Indeksi Gjerman i Transformimit (Bertelsmann Stiftung) raporton, është produkt i tre vjetëve keq-qeverisje të Edi Ramës”, ka theksuar Tabaku.
Sipas saj, thellimi i varfërisë, papunësia që shtohet çdo ditë, taksat e larta, faturat e kripura, gjobat me dorë të rëndë, rënia e fuqisë blerëse, rënia e investimeve, konsumit dhe mirëqenies, ky është realiteti që prodhuan tre vjet mashtrime, dështime, kërbaç dhe korrupsion.
“Kjo nuk është Shqipëria që ne duam. Prandaj ne jemi zotuar se do ta nxjerrim vendin nga kriza Rama. Përmes uljes së taksave, tarifave dhe faturave do ti kthejmë shqiptareve dhe 1 miliard euro çdo vit. Bashke do të ndërtojmë një ekonomi të fortë dhe një të nesërme të sigurte për të gjithe e do ta bëjmë Shqipërinë vendin më atraktiv në rajon për investitorët. Duke i rikthyer besimin bizneseve të huaj dhe atyre vendas për të investuar, për të krijuar vende pune e siguruar mirëqënie”, ka deklaruar Tabaku.
(javanews.al)
