Nga Mira Kazhani
Fotografia e Dafina Zeqirit, këngëtares së famshme të Kosovës nuk meriton vetëm një titull në Tiranapost.al, por respektin e redaksisë. Të gjithë mund të shkruajnë një status, mund të ankohen për median, portalet, për kolegët, por të gjithë kanë në dorë si kjo artiste ta përdorin famën e tyre jo vetëm për akses, reklama në Instagram, privilegje kudo që shkojnë, por në mënyrë të veçantë në funksion të shoqërisë, të të drejtave dhe lirive të njeriut. Kur një artist vesh atletet dhe shkon në shesh me një banderolë si ajo që ka bërë Dafina Zeqiri, është një artist i angazhuar që meriton dashurinë e ndjekësve dhe fansave.
Në Amerikë ka kohë që Hollivudi dhe lëvizja #MeToo nga personazhe publikë, aktorë, këngëtarë, komedianë po jep efektet e saj sepse padyshim kur Meryl Streep thotë diçka shkon në venat e shoqërisë. Artistët kanë një fuqi që s’e kanë politikanët, faqet anonime sado me shume ndjekës. Artistët më shumë se kurrë i duhen shoqërisë për ta shpëtuar në ditët e errëta, në ditët e brishta, siç ka bërë me praninë e saj dhe me një status krejt të sinqertë e të ndjeshëm, Dafina Zeqiri e cila është një artiste e rritur në një shtëpi me shumë vajza, me nënën pa babanë dhe në këto kushte sociale duket se e di mirë se çdo të thotë të jesh grua.
Në Prishtinë sot ka pasur një protestë pas rastit të përdhunimit të një 16 vjeçareje. Në Tiranë, kemi një histori monstruoze me një 14 vjeçare në Kavajë. Ka gumëzhirë rrjeti, emisionet prime time, secili ka dhënë mend, (përfshirë dhe mua), por për fat të keq asnjë nuk ka treguar ndjeshmëri sepse nuk mjafton të themi na vjen keq apo ta cilësojmë monstruoze. Ne duhet të reagojmë me sinqeritet dhe me zemër.
Do kishte qenë fantastike sikur të gjithë këngëtarët dhe artistë shqiptarë të ishin mbledhur dhe t’i kishin thyer hundët politikës dhe medias, ata që janë larg interesave dhe që kanë një ndjeshmëri që ua ka dhënë Zoti.
Sigurisht do kishte qenë historike që adoleshentë të ‘Petro Ninit’, ‘Sami Frashërit’, të shkollave nëpër rrethe të protestonin në emër të të drejtave të vajzave. Asgjë nuk ka ndodhur sepse në Shqipëri po nuk e bëri protestën Lulzim Basha që të paguajë autobusin dhe mbi të gjitha të dalësh për interesat e dikujt tjetër dhe jo të tuat, është tipike shqiptare. Varka e këtij vendi fut ujë nga të gjitha cepat e saj. Dhe që të vijë pranvera meqë jemi në shkurt dhe e kemi në prag, nuk mjafton vetëm një Dafinë.
