Gjyqtari i njohur anglez, Anthony Taylor, i cili vendosi drejtësinë në fushë, në sfidën e luajtur dje në Dortmund midis verdhezinjve dhe francezëve të PSG, do të gjykojë edhe finalen e fazës “Final 4” të kampionatit shqiptar.
Lajmin e bën të ditur Federata Shqiptare e Futbollit. Departamenti i Komunikimit në FSHF bën me dije se është arritur akordi, që finalja në kampionatin “Abissnet Superiore” t’i besohet një prej “bilbilëve” më të vlerësuar në Europë.
Gjithashtu FSHF bën me dije se ndihmësit e Anthony Taylor në finalen e madhe të 26 maj do të jenë të huaj dhe në ditët në vijim do të bëhen publike emrat e përzgjedhur.
Arbitri 45-vjeçar i cili mban prej kohësh stemën e FIFA-s, ka një karrierë të pasur në botën e futbollit pasi drejton takime të nivelit të lartë në Premier League, UEFA Champions League, UEFA Europa League etj.
Gjithashtu Anthony Taylor ka gjykuar edhe disa finale të rëndësishme, ku vlen të përmendet finalja e vitit të kaluar në UEFA Europa League, Sevilla – Roma, ndeshjen finale të FIFA Club Ëorld Cup në sezonin 2022/2023, Real Madrid – Al-Hilal, takimin final të UEFA Nations League të sezonit 2020/2021, Spanjë – Francë, sfidën finale të UEFA Super Cup 2020/2021, Bayern Munich – Sevilla etj.
/a.r
