Pas sulmit të së enjtes ndaj ministres Lindita Nikolla, të shumtë janë ata që kanë pyetur veten se kush fshihet pas kësaj. Thuajse të gjithë u mjaftuan me një “Lëvizje për Universitetin”, por duket se çështja është më e thellë se kaq.
Përgjigjen e pyetjes së mësipërme e jep një media gjermane, e cila ka depërtuar në skutat e ekstremeve shqiptare në një reportazh përpara kësaj ndodhie. “DeutschlandRadioKultur” paralajmëron lindjen e një lëvizjeje ekstreme majtiste. E ka fjalën për Organizatën Politike.
“25 vite pas rënies së regjimit komunist në Shqipëri, ka një tjetër të majtë të re. Prej vitesh ata luftojnë kundër privatizimit të universiteteve”, citohet në reportazh. Gazetarët e radios gjermane kanë zbuluar vendin ku mblidhen për orë të tëra militantët e rinj, “Qendra sociale”. Është një 30-vjeçare me emrin Deni, e cila tregon më tepër për organizatën dhe takimet.
“Është gallatë, në fillim njerëzit spekulonin për qendrën tonë, pyesnin se çfarë bëhet aty. Disa mendonin se është një bordello, të tjerët mendonin mos jemi ndonjë sekt fetar. Më pas i kanë parë fytyrat tona në televizion, pas protestave. Tani në fakt janë miqësorë, madje nuk ankohen as për zhurmën, pasi ndonjëherë jemi të zhurmshëm”.
Radioja gjermane mëson gjenezat e organizatës politike, që daton përpara më shumë se pesë vitesh. Ngjarja tragjike e 21 janarit të 2011- s, ku katër persona u vranë në bulevard, mësohet të ketë qenë arsyeja që disa të rinj të mblidhen në një lëvizje për të ndryshuar diçka.
“Ishte një moment kur ndjen se nuk je askushi. Dikush vritet në rrugë dhe askush nuk kërkon drejtësi. Sepse askush nuk të përfaqëson, askush nuk interesohet për ty”, thotë Bora, 24 vjeçe, për radion gjermane. Në mbledhjet e tyre që zgjasin deri në 24 orë, majtistët ekstremë kanë gjetur edhe mënyra për t’u argëtuar. Të shpeshta janë netët e filmit, festat, diskutimet për të drejtat e punëtorëve në fabrika, apo për teoritë e majta në përgjithësi. Përpos këtyre, ata mohojnë të jenë frymëzuar nga ish-diktatori Enver Hoxha, duke u distancuar nga regjimi i dikurshëm.
“Stalinizmi kishte për qëllim centralizimin, represionin, shkeljen e të drejtave të njeriut. Ajo që kemi pasur në atë kohë në Shqipëri ishte një diktaturë”.
