Situata në jug të vendit ka arritur pikën kritike mbrëmjen e sotme. Lumi Vjosa ka dalë nga shtrati duke kaluar argjinaturën mbrojtëse në fshatin Ferras të Fierit. Përballë kësaj situate emergjente, autoritetet kanë ndërhyrë menjëherë duke evakuuar të gjithë banorët e rrezikuar.
Në vendngjarje ndodhen Zv.Kryeministrja Belinda Balluku, Ministri i Mbrojtjes Pirro Vëngu dhe Kryebashkiaku Armando Subashi për të koordinuar operacionin e shpëtimit dhe përforcimit.
Evakuimi i plotë
Zv.Kryeministrja Balluku, në një prononcim për mediat nga zona e përmbytur, konfirmoi se operacioni i evakuimit është përmbyllur me sukses. “Të gjitha familjet e rrezikuara nga vërshimi i ujërave në fshatin Ferras janë evakuuar” u shpreh Balluku, e cila po monitoron nga afër çdo lëvizje të nivelit të ujit.
Qëndrueshmëria e argjinaturës
Ministri i Mbrojtjes, Pirro Vëngu, dha detaje teknike mbi atë çfarë po ndodh me infrastrukturën mbrojtëse. Ai sqaroi se nuk kemi të bëjmë me çarje të digës, por me tejkalim të lartësisë së saj.
“Prurjet e orëve të fundit kanë qenë të atilla që kanë tejkaluar majën e argjinaturës. Megjithatë, struktura është ende e qëndrueshme dhe po reziston,” theksoi Vëngu.
Pavarësisht situatës dramatike në Ferras, Kryebashkiaku i Fierit, Armando Subashi, dha një lajm shpresëdhënës bazuar në matjet e bëra në rrjedhën e sipërme të lumit. Sipas Subashit, matjet në fshatin Kashisht tregojnë se brenda një ore niveli i ujit ka pësuar një rënie prej 15 cm.
“Kjo rënie pritet të reflektohet edhe këtu në Ferras pas dy a tri orësh, çka shpresojmë të sjellë një lehtësim të situatës,” deklaroi Subashi.
