2 persona mbetën të vrarë dhe 6 të tjerë u plagosën gjatë një sulmi me thikë jashtë një kazinoje në Las Vegas. Autori është identifikuar si Yoni Barrios, 32 vjeç. Sipas asaj që shkruan Sky News, ngjarja ndodhi në bulevardin Las Vegas, përballë kazinosë dhe hotelit Wynn, rreth 11:40. Mes të plagosurve janë vajzat e shfaqjes dhe interpretuesit e rrugës. Nga 6 të plagosurit e dërguar në spital, 3 janë në gjendje kritike dhe 3 të tjerët mësohet se janë jashtë rrezikut për jetën.
Viktimat janë identifikuar si Brent Hallett, 47 vjeç dhe Maris Digiovanni, 30 vjeç. Autori i sulmit u largua në këmbë nga vendi i ngjarjes, por u ndoq nga kalimtarët që e ndaluan dhe më pas u arrestua nga policia.
Sa i përket shkaqeve që e çuan 32-vjeçarin të ndërmerrte këtë akt, momentalisht ato janë të paqarta. Megjithatë, një dëshmitar tha se i dyshuari ishte kuzhinier dhe donte të bënte një foto me një grup vajzash të show-t me thikën në dorë. Por ai u revoltua kur ato refuzuan.
/a.r
