Teksa ministrja për Turizmin dhe Mjedisin në vend, Mirela Kumbaro, prezantoi Strategjine e Shqipërisë Turistike 2030, u shpreh se një theks të veçantë do i vihet teknologjisë.
Kumbaro deklaroi se në shërbim të industrisë së turizmit, do të jetë një platformë e quajtur “e-visitor”.
Kjo platformë vjen nga bashkëpunimi i Ministrisë së Turizmit dhe Mjedisit, e Fondit Shqiptar të Zhvillimit, të AKSH-it, Bankës së Shqipërisë dhe INSTAT-it.
Ministrja sqaron se deri më tani është përgatitur arkitektura teknike e kësaj platforme. Besohet se sistemi i “e-visitor” do të ndërtohet i plotë në vitin 2026.
Më tej, Kumbaro tha se teknologjia e integruar në turizë, do mundësojë regjistrin digjital të kësaj industrie për të gjitha sipërmarrjet turistike, gjurmimin në kohë reale me strukturat akomoduese e çdo aktivitet tjetër në e-visitor, si dhe mbledhja e statistikave në sektor në mënyrë digjitale.
“Kemi gati piketat për të ardhmen e qëndrueshme ku industria e turizmit tashmë e ka shtyllën ku do të mbështetet. Strategjia Kombëtare e Turizmit 2025 – 2030, e miratuar në mbledhjen e qeverisë disa javë më parë në muajin korrik, që e ndan Shqipërinë në gjashtë rajone turistike, me një ofertë më mirë të organizuar, teksa do vijojmë të jemi pjesë e panaireve më të rëndësishme ndërkombëtare sepse jo thjesht e kërkojmë, por na ftojnë.
Gjithashtu, teknologjia, inovacioni, do të jenë një element shumë i rëndësishëm. Është jo thjesht si një prioritet i qeverisjes sonë, por si një domosdoshmëri e epokës që jetojmë. Cila është kjo shtyllë?
Praktikisht, Shqipëria Turistike 2030, do të ketë një instrument të ri që është platforma e integruar digjitale e turizmit. Është një punë dy vjeçare që tani kurorëzohet. E ministrisë së Turizmit, Mjedisit, e Fondit Shqiptar të Zhvillimit, e AKSH-it, Bankës së Shqipërisë dhe INSTAT-it që e kanë përgatitur tashmë arkitekturën teknike tashmë për këtë platformë, sistemi i së cilës do të ndërtohet i plotë në vitin 2026, për t’u futur në funksion me efikasitet brenda mandatit të katërt me tre element kryesore:
Regjistri digjital të turizmit për të gjitha sipërmarrjet turistike
Platformën digjitale e-visitor, për regjistrimin elektronik dhe gjurmimin në kohë reale të vizitorëve më strukturat akomoduese dhe çdo aktivitet tjetër të sektorit
Një sistem i integruar të mbledhjes dhe analizimit të statistikave në sektorin e turizmit përmes sistemit elektronik të të dhënave në turizëm”, tha Kumbaro.
