Nga Mero Baze
Rinumërimi i votave në 64 kuti në Tiranë, ndryshoi me 5 vota rezultatin për mandatin e Shpëtim Idrizit, duke mos bërë të mundur të jetë deputet në parlament. Kjo me sa duket ka nxitur një kërkesë të re për rinumërim total të Tiranës. Ndoshta do të ketë dhe kërkesa të tjera për të hapur kuti të veçanta apo zona të caktuara edhe nga parti të tjera. Duket se tani lidhet më shumë me një përpjekje politike për ta zvarritur rezultatin e zgjedhjeve përtej 24 korrikut, se sa me ndonjë pritshmëri për zgjedhjet.
Procesi i rinumërimit dëshmoi shkujdesje të numëruesve ndaj votave të partive të vogla, me një shpërndarje statistikore, që vërtitet rreth realitetit, por që dëshmon se kemi ende punë me përgjegjshmërinë dhe sidomos saktësinë e administratës së votuesve.
Por nga ana tjetër, Shpëtim Idrizi nuk është i vetmi që humbet me mbi tridhjetë vota. Partia Socialiste ka dorëzuar Bashkinë e Kavajës, pa kërkuar as rinumërim me më pak se tridhjetë vota, dhe kjo, për të respektuar itnegritetin e procesit.
Shtyrja e daljes së rezultatit të zgjedhjeve, nuk lidhet pra me integritetin e zgjedhjeve, por me problemet e opozitës së re.
Ajo lidhet me faktin që dy drejtusit real opozitarë, Ilir Meta dhe Lulzim Basha, kanë më të rëndësishme zgjedhjet e tyre me 22 dhe 24 korrik, se zgjedhjet e 25 qershorit. Pa përfunduar kurorëzimi i tyre në krye të partive, mos prisni të ketë rezultat të zgjedhjeve kombëtare. Procesi do zvarritet me ankimime banale, thjesht për të fituar kohë.
Pasi Basha të zgjidhet kryetar i PD dhe Meta të shkojë në Presidencë, atyre u nevojitet një kauzë e përbaljtes së zgjedhjeve, për të ngjizur një bashkim mes tyre.
Pas kësaj, do të jetë më e lehtë retorika e zgjedhjeve të vjedhura për të shërbyer si kauzë bashkimi mes LSI dhe PD, pasi kanë rritur pritshëmrinë para zgjedhjeve që do ishin fituese.
Pra zgjedhjet nuk po ankimohen dhe as po zvarriten se kanë problem reale, por se duhet të përdoren për të ngjizur një aleancë të opozitës së re dhe të autosugjestionojnë opozitën.
Nga mënyra se si po shkon gara në PD dhe nga ndarja që po thellohet mes palëve, Lulzim Basha do të përfundojë siç thoshte Pollo dikur për Berishën, si “kryetar i fraksionit të vulës” dhe kjo do ta bëjë atë, detyrimisht një skllav të LSI, në rrugën drejt pushtetit. Aleanca strategjike e tij me LSI, është jo vetëm e pashmangshme, por dhe si e vetmja zgjidhje për të mbijetuar politikisht me një parti gjithnjë e më të vogël në të ardhmen.
Grupi tjetër ose do të vazhdojë luftën kundër tij, ose do të prodhojnë diçka të re, që do ta dërrmojë dhe më keq atë. Kjo nuk e ndryshon objektivin e Bashës, por mund të ndryshojë vetëm rezultatin e tij.
Ndaj, edhe pse zgjedhjet duket qartë që janë të përfunduara, procesi i zvarritjes do të tejkalojë datat 22 dhe 24 korrik, ashtu siç pritej qysh në fillim. Pasi Meta të konfirmohet president, Basha kryetar i fraksionit të vulës dhe Rama kryeministër, do të qetësohemi dhe nga kjo lodhje e kotë nëpër vapë e KQZ.
Nuk është betejë për 74 mandatet e Ramës, por për të mbajtur të bashkuar mandatet e opozitës së re.
