Administrata Trump po përpiqet të deportojë një person, i cili vetëdeklarohet si ish-agjent i CIA-s. Ai u infiltrua në Al-Kaeda pas sulmeve të 11 shtatorit dhe fitoi lejen e qëndrimit në SHBA duke ndihmuar në dënimin e disa terroristëve.
Agjentët e Imigracionit dhe Doganave (ICE) arrestuan Blerim Skoron — një baba të tre fëmijëve, i lindur në Kosovë — jashtë një zyre imigracioni në Nju-Xhersi, ku ai po rinovonte dokumentet e tij në fillim të këtij muaji.
Avokatët e tij kanë paraqitur një kërkesë në gjykatën federale për të ndaluar deportimin, duke argumentuar se 55-vjeçarit iu premtua qëndrimi i përhershëm në vend pas viteve të tëra pune me rëndësi kritike si “agjent i CIA-s”.
Skoro, i cili punon si shofer taksie në Staten Island të Nju-Jorkut dhe ka një bashkëshorte e fëmijë amerikanë, fitoi pezullimin e dëbimit në vitin 2022 për shkak të rrezikut të lartë të kapjes dhe torturimit nga terroristët nëse deportohej.
Sipas avokatëve të tij, ky vendim u mor pjesërisht për shkak të ndihmës që Skoro dha në arrestimin e anëtarëve të Al-Kaedës, Al-Shabaab-it dhe Hezbollahut.
Tani ai frikësohet se qeveria — për të cilën pretendon se i vuri jetën në rrezik — do ta kthejë në Kosovë, drejtë e në duart e atyre që e duan të vdekur.
“Nuk e mendova kurrë se do të më tradhtonin në këtë mënyrë,” tha ai për CBS News gjatë një interviste telefonike nga Qendra e Paraburgimit “Elizabeth” në Nju-Xhersi. “Ju lutem, nëse duhet të vdes, të vdes në këtë vend, që fëmijët e mi të mund të më varrosin.”
Dokumentet e FBI-së tregojnë se marrëdhënia e Skoros me zyrtarët e inteligjencës amerikane filloi kur ai u burgos për trafik droge në vitin 2000.
Ai tregon se po luftonte për të siguruar jetesën e fëmijëve dhe prindërve të tij refugjatë, pasi familja u largua nga konflikti i Kosovës në vitet 1990. Në atë periudhë, ai u kap duke transportuar heroinë jashtë shtetit për llogari të një bande kriminale shqiptare.
I rritur si mysliman, ai u mirëprit nga një grup radikalësh islamikë në një burg të Manhatanit, ku filloi të vuante dënimin. Dosjet e FBI-së e rendisin atë si informator konfidencial nga ajo periudhë. Pas 11 shtatorit, Skoro thotë se CIA i kërkoi të shfrytëzonte këto lidhje.
Gjatë kohës që vuante dënimin në burgun federal FCI Allenwood në Pensilvani (midis viteve 2002 dhe 2006), Skoro pretendon se mblodhi informacione për FBI-në lidhur me disa terroristë. Mes tyre përfshiheshin: Faysal Galab nga i ashtuquajturi grupi “Lackawanna Six” (të cilin agjentët federalë e përshkruan si qelizën e parë të fshehur terroriste në SHBA); Randall “Ismail” Royer nga rrjeti i xhihadit të Virxhinias (i dënuar për organizimin e dhunës kundër trupave amerikane jashtë vendit); si dhe anëtari i Hezbollahut, Junuz Fuaz.
Të dhënat e redaktuara të FBI-së të vitit 2004, të siguruara nga CBS News, e rendisin Skoron si informator në një hetim që synonte Osama bin Ladenin, duke ofruar herë pas here informacione “të zbatueshme” dhe “të besueshme”, përfshirë detaje mbi një “kamp stërvitjeje në Siri”.
Skoro besonte se do të merrte një dënim të reduktuar për kontributin e tij, por në vend të kësaj u deportua në Kosovë në vitin 2007. Ai pretendon se CIA udhëzoi që të infiltrohej në Al-Kaeda nga Ballkani, duke u kthyer në SHBA vetëm në vitin 2014, siç ka deklaruar më parë në mbrojtjen e tij ligjore për çështjen e imigracionit.
Skoro pretendon se ka shërbyer si agjent i fshehtë i CIA-s brenda grupit terrorist nga viti 2007 deri në vitin 2009, duke udhëtuar në një kamp të ISIS-it në Siri dhe duke operuar në Liban, Jordani, Pakistan, Egjipt, si dhe në vendlindjen e tij.
Fotografitë dhe videot e bëra gjatë asaj kohe e shfaqin atë në mjedise të Lindjes së Mesme pranë terroristëve të njohur. Këto pamje u përdorën në dokumentarin e vitit 2024, “The Accidental Spy”, si dhe në një episod të emisionit “The Shawn Ryan Show” në YouTube vitin e kaluar.
Ai duket se ka qenë i përfshirë drejtpërdrejt në arrestimin e terroristit nga Bruklini, Betim Kaziu, i cili u dënua me 27 vjet burg pasi u përpoq të blinte armë për grupin terrorist somalez Al-Shabaab me qëllim sulmin ndaj trupave amerikane jashtë vendit.
Në deklaratën e tij të dhjetorit 2020, Skoro shkroi se kishte telefonuar fshehurazi kontaktin e tij në CIA për t’i dhënë vendndodhjen e Kaziut, ndërsa e priste atë në apartamentin e tij në Kosovë. Kjo çoi në arrestimin e Kaziut në korrik të vitit 2009, kur iu sekuestruan një pushkë, municione dhe granata.
Skoro ndau me CBS News komunikimet me email mes tij dhe personit që pretendon se ishte koordinatori i tij në CIA, i njohur si “Chris”. Në një email të datës 24 shtator 2009 shkruhej: “Isha shumë i lumtur kur pashë që miku ynë Kaziu tashmë është kthyer në Shtetet e Bashkuara.” CIA nuk i është përgjigjur kërkesës për koment.
Skoro pretendon gjithashtu se ka ndihmuar në bllokimin e dërgesave të uraniumit në Kosovë — duke parandaluar një komplot të mundshëm për krijimin e një “bombe” — si dhe se pas kthimit në SHBA në prill 2015, i ofroi informacione shtesë FBI-së dhe Policisë së Nju-Jorkut (NYPD) kur u kontaktua nga një rekrutues i ISIS-it.
Ish-avokati mbrojtës i Skoros, Joshua Dratel, tha për CBS News se gjatë dekadës së fundit klienti i tij ka bërë një “jetë të ndershme dhe produktive pranë familjes, pas një përvoje të tmerrshme që e kreu për Shtetet e Bashkuara me shumë guxim dhe aftësi”.
Kërkesa e tij për habeas corpus, e paraqitur në gjykatën federale pas arrestimit në fillim të këtij muaji, citohet se ai “punoi për CIA-n, Byronë Federale të Hetimit (FBI) dhe Agjencinë Amerikane Kundër Drogës (DEA) për gati një dekadë,” duke kryer “një punë të përkushtuar dhe heroike si agjent i zbatimit të ligjit në Shtetet e Bashkuara.”
Bashkëshortja e tij, Susan Skoro, ndodhej me të në zyrën e imigracionit në Elizabeth, Nju-Xhersi, kur ai u arrestua më 3 gusht. Ajo tregoi se sapo ai u paraqit në recepsion, oficerët e ICE-it u hodhën mbi të, e futën në një dhomë dhe më pas e morën me makinë.
“E tradhtuan. Ai e kreu dënimin e tij, pothuajse humbi jetën dhe askujt nuk i bëhet vonë. Ai meriton falje,” tha ajo. “Ai nuk mund të deportohet i sigurt në asnjë vend. Ne jemi gjithmonë nën vëzhgim.”
Kosovari mbërriti për herë të parë në Amerikë në vitin 1994 për të kërkuar azil, pasi kishte dezertuar nga Ushtria e atëhershme Jugosllave pasi ishte bërë dëshmitar i dhunës dhe vrasjeve të fëmijëve nga ushtarët, tha ai.
Pas viteve të tëra shërbimi në spiunazh për SHBA-në, Skoro thotë se mbulimi i tij u zbulua dhe ai mbeti i plagosur në këmbë gjatë një atentati në Kosovë. Kjo e detyroi të largohej dhe të rihynte ilegalisht në SHBA përmes Kanadasë në vitin 2014.
Ai ra përsëri në duart e ICE-it në vitin 2016, pasi NYPD-ja e arrestoi për përdorimin e kartës së zbritjes së transportit publik të vajzës së tij studente, gjë që nxiti një betejë të gjatë ligjore për statusin e tij të imigracionit.
Në nëntor 2022, një gjykatës federal i ndaloi qeverisë deportimin e Skoros në Kosovë për shkak të rrezikut të torturës dhe eliminimit fizik atje, mbështetur në traktatin ndërkombëtar të njohur si Konventa Kundër Torturës, mirëpo nuk i dha atij leje qëndrimi të ligjshëm.
Bhairavi Desai, drejtoreshë ekzekutive e sindikatës së taksistëve ku bën pjesë Skoro, u shpreh “e tronditur” kur zbuloi se statusi i shoferit “mbresëlënës, humoristik dhe të sjellshëm” ishte në terren të pasigurt.
“Mendova se duke pasur parasysh punën e tij në luftën kundër terrorizmit në emër të CIA-s, ai do të kishte marrë statusin e përhershëm këtu,” tha Desai për CBS News. “Është vërtet brutale ta përdorësh dikë në këtë mënyrë e më pas ta braktisësh.”
Avokatët e Skoros, Rene Kathawala dhe Amy Greer, paraqitën peticionin habeas corpus më 4 gusht, duke argumentuar se falë mbrojtjes së dhënë nga gjykata në vitin 2022, ICE-i duhet të marrë miratimin e një gjyqtari përpara se ta deportojë atë — një procedurë që agjencia nuk e ndoqi.
Përgjatë këtij muaji, ICE-i deportoi një grup shtetasish meksikanë që gëzonin të njëjtën mbrojtje ligjore si Skoro (pezullim i dëbimit sipas Konventës Kundër Torturës), pasi Departamenti i Shtetit mori garanci nga qeveria meksikane se të deportuarit nuk do të dëmtoheshin.
Procedurat e dëbimit të tyre nisën gjithashtu pa një kërkesë paraprake në gjykatën federale, siç raportoi The New York Times javën e kaluar.
“Kjo është një tjetër çështje që lidhet me faktin nëse Zyra e Imigracionit dhe Doganave (ICE) mundet — pa njoftim, pa arsye dhe pa proces ligjor — të arrestojë dhe të ndalojë në mënyrë arbitrare e pa afat një shtetas të huaj cilit i është njohur e drejta e pezullimit të largimit sipas Konventës Kundër Torturës,” thuhet në peticionin e ndryshuar habeas corpus të Skoros, të paraqitur më 17 gusht. “Përgjigja për këtë pyetje është kategorikisht jo. Ky qëndrim është konfirmuar nga praktikat gjyqësore në të gjithë vendin.”
Gjyqtari i Gjykatës Federal të Qarkut në SHBA, Robert Kirsch, urdhëroi qeverinë të paraqesë përgjigjen e saj zyrtare deri të enjten.
ICE-i konfirmoi marrjen e kërkesës së CBS News për koment, por nuk dha sqarime, ndërsa CIA dhe FBI-ja nuk u përgjigjën.
