Alain Robert, i quajtur ndryshe edhe si “Spidermani francez”, u ngjit në një qiellgërvishtës në Paris për të demonstruar mbështetjen e tij për protestuesit e zemëruar të cilët janë kundër reformës së pensioneve në Francë.
Duke u ngjitur në rrokaqiellin 150 metra në lagjen e biznesit La Défense të Parisit, 61-vjecari i dërgoi një mesazh të fortë presidentit Emmanuel Macron.
“Jam këtu për të treguar mbështetjen time për ata që kundërshtojnë reformën e pensioneve. Në fund qeveria, si zakonisht, vendosi të përdorë kompetenca të veçanta kushtetuese dhe vendosi të mos dëgjojë zërin e qytetarëve. Të gjithë ishin kundër dhe për këtë arsye protestuam. Unë jam këtu për t’i thënë presidentit Emmanuel Macron, të kthehet me këmbë në tokë dhe prandaj do të ngjitem në majë pa rrjetë sigurie, për ta bërë atë të kuptojë se unë gati 61 vjeç dhe kam nevojë të vazhdoj të jetoj.”
Ai filloi të ngjitej në vitin 1975, duke u stërvitur në shkëmbinjtë pranë vendlindjes së tij Valence në Francën jugore.
Që atëherë, ai është ngjitur në më shumë se 150 struktura të larta anembanë botës, duke përfshirë Burj Khalifa të Dubait, ndërtesën më të lartë në botë, Kullën Eifel dhe Urën Golden Gate të San Franciskos. Ky veprim i Robertit është një kujtim i rasteve të ngjashme, të cilat shpesh ishin të motivuara nga shkaqe sociale dhe politike.
Në vitin 2019, ai u ngjit në Kullën Totale në La Défense për të rritur ndërgjegjësimin për ndotjen e ajrit. Në vitin 2018, ai u ngjit në Kullën Heron në Londër për të protestuar kundër korrupsionit dhe padrejtësisë.
Ndërsa këtë vit ai dëshironte donte të përdorte këtë rast për të shprehur kundërshtimin ndaj ligjit të pensioneve që ka zemëruar jo pak francezët të cilët kanë dalë në rrugët e Parisit dhe janë përleshur më herët edhe me policinë.
“Sa më shumë e rrisim moshën e pensionit me kalimin e kohës, aq më shumë bëhet e vështirë. Dhe e kuptoj pse populli francez është i ngopur. Jemi në një situatë jashtëzakonisht të vështirë, ku çdo gjë kushton shumë.”
Presidenti Macron argumenton se reformat janë thelbësore për të parandaluar kolapsin e sistemit të pensioneve.
Sipas kësaj reforme mosha e daljes në pension pritet të rritet nga 62 në 64 vjeç. Por krahasuar me Gjermaninë apo vendet e tjera të Evropës, sistemi francez i pensioneve është shumë më i mirë. Pensionistët francezë kanë dalë shumë më të privilegjuar në një krahasim ndërkombëtar, bazuar në tre kritere: shuma e pensionit, mosha minimale e daljes në pension dhe kohëzgjatja e marrjes së pensionit, pra jetëgjatësia e llogaritur në fillim të pensionit.
Një numër vendesh evropiane tashmë planifikojnë rritje të mëtejshme të moshën së pensionit si në Holandë, Danimarkë, Estoni dhe Itali, ku mosha e daljes në pension do të rritet në 69 ose më shumë në vitet e ardhshme.
Në Gjermani, për shembull, duke filluar nga viti 2024 mosha e pensionit do të rritet gradualisht deri në 67. Kjo e rrit automatikisht edhe kohëzgjatjen e qëndrimit në marrëdhënie pune. Kush ka punuar deri tani 41,5 vjet, sipas projektligjit të ri do të punojë 43 vjet.
