Skandal shëndetësor në Spanjë. Në një komunikatë të publikuar të shtunën, Agjencia spanjolle e Medikamenteve dhe e Prodhimeve Shëndetësore (AEMPS) ka njoftuar për 41 raste të personave të dëmtuar pas përdorimit të prodhimit të kirurgjisë “Ala Octa”, i hequr nga përdorimi prej Ministrisë spanjolle të Shëndetësisë në qershor dhe për të cilin dyshohet se ka verbuar shumë persona.
“Deri më tash janë konfirmuar 13 raste të verbimit, pra humbjes së plotë të shikimit të njërit sy”, thekson AEMPS-ja, shkruan gazeta “Zëri”.
“Jam operuar më 2 qershor në spitalin publik të San Sebastianit (veriperëndim të vendit) dhe të nesërmen nuk shihja hiç me syrin e majtë”, ka treguar të shtunën Mikel Gonzalez, 44-vjeçar. “një muaj e gjysmë më vonë më kanë thënë se është një prodhim i keq, ai më ka verbuar në njërin sy”, ka shtuar ky banor i rajonit bask.
Në këtë rajon autonom, “të paktën shërbimi shëndetësor i ka pranuar rastet. Shpresoj se do të na dëmshpërblejnë”, thotë z. Gonzalez, i cili vazhdon të punojë në një zyrë.
Pacientët janë përballur edhe me komplikime të tjera, të cilat janë regjistruar nga AEMPS: nekrozë e retinës, atrofi e nervit optik, zvogëlim i mprehtësisë së shikimit, inflamacione…
Në përgjithësi, 41 raste janë regjistruar në 11 institucione shëndetësore të Spanjës, sidomos në rajonin e Baskisë.
Agjencia spanjolle kishte ndezur alarmin më 26 qershor, duke njoftuar se prodhimi “Ala Octa”, i prodhuar nga “Alamedics GmbH” për kirurgji të retinës është tërhequr nga tregu. Disa ditë më vonë, një furnizues kishte njoftuar për 20 raste të dyshimta në Spanjë.
“Mostrat janë dërguar në një institut spanjoll për hulumtime të specializuara në oftalmologji për analiza”, njofton AEMPS-ja, e cila thotë se po bashkëpunon me laboratorin me seli në Dornstadt (Gjermani) dhe me autoritetet gjermane.
“Alamedics” u kishte dërguar më 13 korrik një letër të gjithë furnizuesve, të cilët i njoftonte se ky produkt hiqet nga tregu deri në sqarimin e rrethanave pas dyshimeve se ai po u shkakton telashe pacientëve.
