Nga Denis Dyrnjaja
Prej disa muajsh, goditjet ndaj krimit të organizuar dhe korrupsionit të lartë në Shqipëri kanë marrë një intensitet të pazakontë për standardet tona. SPAK, institucioni më i debatuar dhe më i sulmuar nga politika dhe interesat e mëdha ekonomike, po jep sinjale të qarta se koha e pandëshkueshmërisë po zbehet, megjithë rezistencën që has.
Sekuestrimi i miliona eurove cash, i pronave me origjinë të dyshimtë dhe zbardhja e lidhjeve mes trafikut të drogës dhe ndërtimit apo tenderëve publikë, po ekspozojnë një pjesë të madhe të pasurisë së ndërtuar mbi krimin. Sipas të dhënave zyrtare, vetëm në 6 muajt e parë të vitit 2025, SPAK ka sekuestruar mbi 50 milionë euro asete dhe ka lëshuar dhjetëra urdhër-arreste ndaj individëve të lidhur me krimin dhe korrupsionin.
Vendosja ne tryezën e hetimit të grupeve të strukturuara kriminale, me emër, ndikim dhe reputacion në qytetet dhe zonat që kanë nën kontroll, ka rritur ndjeshëm forcën goditëse të ligjit dhe ka krijuar panik nga paparashikueshmëria e hetimeve dhe arrestimeve.
Përveç emrave të njohur të botës së errët, nga Bajrat në Shkodër, te Pojat në Durrës, apo Çopjat në Elbasan, po goditen edhe individë që nuk kanë qenë fare të ekspozuar si personazhe, por që kanë akumuluar pasuri të mëdha nga aktivitete të paligjshme. Goditja e një grupi të madh të trafikut të drogës, ku vetëm njëri nga anëtarët gjeneronte të ardhura deri në 100 milion euro, është një mesazh shumë domethënës për forcën e veprimit të SPAK-ut. Ligji nuk është shaka, burgu gjithashtu.
Sigurisht një rol të madh po luajnë edhe shërbimet partnere, por në fund të fundit ndjekja penale po ndodh në Shqipëri. Ndaj meritë për këtë ka organi i hetimit në ndjekje të çështjeve që janë të komplikuara, por edhe të shumta si tematika për hetim e gjykim.
Kjo do të thotë se tani këto operacione nuk janë më vetëm aksione mediatike, por një provë se sistemi ka filluar të godasë aty ku dhëmb më shumë: te pasuria e paligjshme. Por ajo që ka më shumë rëndësi tani është se ata që ruheshin deri dje vetëm nga rivalët, sot do të duhet të bëjnë llogari edhe me ndjekjen nga organet ligjzbatuese dhe më konkretisht nga prokuroria dhe gjykata e posaçme.
SPAK-u nuk është i përsosur. Ka ende rrugë për të bërë. Por një gjë është e qartë: ka nisur të “pastrojë” një Shqipëri që për dekada është larë me para të pista. Dhe po e bën më mirë se çdo lavatriçe tjetër që kemi provuar deri më sot.
