Nga Eduard Zaloshnja/
Kompania italiane IPR-Marketing prezantoi sot baterinë e tretë të sondazheve në Shqipëri për televizionin Ora News. Kjo kompani ka zhvilluar sondazhe për këtë televizion edhe në vitet 2009 e 2013, para zgjedhjeve dhe ditën e zgjedhjeve. Në 2009-ën, rezultatet e zgjedhjeve u përputhën saktësisht me rezultatet e sondazheve të saj, dhe në 2013-ën, pothuajse u përputhën saktësisht në nivel koalicioni.
Për herë të parë sonte, IPR-Marketing prezantoi rezultatet e një sondazhi kombëtar për votën popullore të 21 qershorit. Sipas sondazhit, koalicioni mazhoritar ka aktualisht 26 pikë përqindje epërsi kombëtare ndaj atij opozitar (partitë jashtë koalicioneve marrin 2% të votave).
Duke marrë për bazë pjesmarrjen në zgjedhjet e fundit lokale (2011), si dhe sondazhin e sipërpëmendur, rezulton se koalicioni mazhoritar ka sot një epërsi prej rreth 400 mijë votash ndaj atij opozitar (partitë jashtë koalicioneve kanë rreth 31 mijë vota).
Për krahasim, në zgjedhjet e fundit parlamentare (2013), partitë që janë sot pjesë e koalicionit mazhoritar morën 430 mijë vota më shumë se ato që janë aktualisht pjesë e koalicionit opozitar.
Shënim. Disa parti të vogla, si PBDNJ, PSD, AP, LDP, PPSHR, PBRSH, PKDSH, PA, PDIP, PESH, PRRVSH, PLSHR, PBPPSH, etj., janë larguar nga koalicioni mazhoritar, ndërsa disa të tjera, si PDIU, FRD, PDK, etj. i janë bashkuar atij kohët e fundit.
